Jol salasy boıynsha bilim alyp jatqan stýdentter jaz kezinde jumyspen qamtylmaq
NUR-SULTAN. QazAqparat - «Jol aktıvteri ulttyq sapa ortalyǵy» RMK otandyq salalyq JOO-lar stýdentterin taǵylymdamaǵa qabyldaıdy, dep habarlaıdy QazAqparat tilshisi.
Búgin atalǵan ortalyq basshylyǵy L.B.Goncharov atyndaǵy Qazaq avtomobıl-jol ınstıtýtynyń 2-4 kýrs stýdentterimen onlaın kezdesip, jol mamandyǵynyń artyqshylyqtary týraly sóz qozǵady.
«Prezıdentimiz Qasym-Jomart Toqaev ozyq oıly, básekege qabiletti mamandar elimizge óte qajet dep árqashan aıtyp júredi. Bizdiń ortalyq ta bul baǵyttaǵy jumystardy bastap ketti. Jol aktıvteri ulttyq sapa ortalyǵy jyl basynda mektepterge jol mamandyqtary boıynsha kásibı baǵdar berý jumystary aıasynda «1000 mektep» aktsııasyn bastaǵan bolatyn. Ortalyq mamandary osy ýaqytqa deıin elimizdiń árbir óńirindegi mektepterge baryp, jol mamandyǵyna baǵdar berý jumystaryn júrgizdi. Elimizdegi tótenshe jaǵdaıǵa oraı barlyq oqý qashyqtan júrgizilýine baılanysty, fılıaldar stýdenttermen tikeleı baılanysqa shyǵyp, onlaın dáris berip jatyr», - dedi «Jol aktıvteri ulttyq sapa ortalyǵy» RMK bas dırektory Zamır Saǵynov.
Onyń sózine qaraǵanda, Almaty qalasy men Qostanaı oblystary jaqynda baılanysqa shyqty. Qazaqstannyń oqý-oryndaryndaǵy avtomobıl joldaryna qatysty mamandyq ıelerimen onlaın semınar ótkizý josparlanyp otyr.
«Búgin sol is-sharalardyń jalǵasy retinde L.B.Goncharov atyndaǵy Qazaq avtomobıl-jol ınstıtýtynyń 2-4 kýrs stýdentterimen onlaın kezdesip, jol mamandyǵynyń artyqshylyqtary týraly sóz qozǵadyq. Memlekette joldardy salý jáne damytý boıynsha tıisti jumystar júrip jatyr, onyń ishinde «Nurly jol» baǵdarlamasy aıasynda oblystardaǵy joldardy salý jobalary jáne tapshylyq týǵyzatyn mamandyqtar tóńireginde talqyladyq. Sonymen qatar jol mamandyǵynyń erekshelikteri, qaıda jumysqa turýǵa bolatyny týraly, tólenetin eńbekaqy jaıynda da áńgimelestik», - dedi Z. Saǵynov.
Onyń atap ótýinshe, jazǵy demalys kezinde Jol aktıvteri ulttyq sapa ortalyǵy árbir oblystan 3-4 stýdentti tájirıbeden ótýge shaqyrtady.
«Bul bir jaǵynan stýdentterge úlken tájirıbe bolmaq, sebebi ol aldaǵy ýaqytta jastardyń maman bolyp qalyptasýyna kóp áserin tıgizedi. Ekinshi jaǵynan, istegen jumysyna qaraı eńbekaqy da alady. Stýdentter de oılandyryp júrgen suraqtaryna jaýap aldy dep oılaımyn. Osy kezdesýdi uıymdastyrýǵa atsalysqan ınstıtýt ujymyna, basshylyǵyna alǵys aıtamyn. Endi stýdentter men oqýshylar arasynda kásibı baǵdar berý jumystaryn osylaı onlaın túrde ótkizýdi ári qaraı jalǵastyratyn bolamyz», - dedi kompanııa basshysy.
Aıta keteıik, búgingi talqylaýǵa 100-ge tarta stýdent qatysty.
