Jol salasyndaǵy tehnıkalyq qadaǵalaýdy Qurylys mınıstrligi quzyrynan shyǵarý kerek – depýtat
ASTANA. KAZINFORM – Oblystyq jáne aýdandyq mańyzy bar joldardyń sapasy tómen. Bul týraly Senatta joldardyń máselesin talqylaýǵa arnalǵan Úkimet saǵatynda senator Álibek Náýtıev málim etti.
- Munyń negizgi - sebepteriniń biri avtomobıl joldaryn salý jáne jóndeý obektilerindegi tehnıkalyq qadaǵalaý deńgeıiniń jetkiliksizdigi. Máselen, Jol aktıvteri sapasynyń ulttyq ortalyǵy sońǵy 5 jylda jumys júrgizý obektilerinde tehnıkalyq qadaǵalaý qyzmetteri bolmaýynyń 500-den astam faktisin anyqtady, - dedi Á.Náýtıev.
Onyń aıtýynsha, mundaı obektilerde sapasyz jol-qurylys materıaldaryn paıdalaný jáne tehnologııalardy saqtamaý jaǵdaılary anyqtalyp, óz kezeginde joldardyń sapasyna teris áser etip otyr. Sonymen qatar, qoldanystaǵy zańnamada mundaı faktiler úshin qadaǵalaý qyzmetine yqpal etý sharalary qarastyrylmaǵan.
- Osyǵan oraı, qadaǵalaý qyzmetteriniń jaýapkershilik sharalaryn zańnamada bekitý qajettigine nazar aýdaramyz. Aıta ketý kerek, qazirgi ýaqytta avtomobıl joldary salasyndaǵy tehnıkalyq qadaǵalaýdy retteýge qatysty fýnktsııalar Ónerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń qaraýynda. Avtomobıl joldaryn salý, rekonstrýktsııalaý jáne jóndeý sapasyn arttyrý úshin bul fýnktsııalardy Kólik mınıstrliginiń Avtomobıl joldary komıtetine berý usynylady. Bul avtomobıl joldary salasynda tehnıkalyq qadaǵalaýdy júzege asyratyn zańdy tulǵalardy akkredıtteý qaǵıdalaryn bekitýge, akkredıtteýdi júrgizýge, sondaı-aq akkredıttelgen uıymdardyń tizilimin júrgizýge jáne basqa da is-sharalarǵa qatysty. Budan basqa, bilikti, onyń ishinde saraptama bóligindegi kadrlardyń tapshylyǵy máseleleri joq emes. Máselen, kóp jaǵdaıda tehnıkalyq qadaǵalaý sarapshylarynyń tıisti jol bilimi joq jáne sol tehnıkalyq qadaǵalaý jol obektilerinde de, azamattyq qurylys obektilerinde de jumys atqaratyny belgili. Bul jaǵdaı jalpy avtojol salasyna tán. Jumys berýshiler kadrlardyń biliktiligin arttyrýǵa qyzyǵýshylyǵy joq ekeni baıqalyp otyr, - dedi depýtat.
Budan buryn habarlanǵandaı, senator jergilikti joldardyń sapasyna qatysty problemany atady.