Jol salasyndaǵy negizgi jobalar bıyl tolyq aıaqtalady
ASTANA. KAZINFORM – Jol salasyndaǵy negizgi jobalar bıyl tolyq aıaqtalady. Bul týraly Kólik mınıstrliginen málim etti.
«Bıyl 3,1 myń shaqyrym jol jańǵyrtýmen qamtylmaq. Onyń ishinde «Qaraǵandy – Almaty», «Atyraý - Astrahan», «Aqtóbe - Qandyaǵash», «Taldyqorǵan – Óskemen» syndy ótpeli jobalar bar. 2023 jyly barlyq kúsh joldyń jańa qabatymen qozǵalysty qamtamasyz etýge baǵyttaldy. Osy jyly negizgi jobalar boıynsha jumystardy tolyq aıaqtaý kózdelgen. Alaıda, keıbir jobanyń qurylys merziminiń uzaqqa sozylýy ártúrli faktorlarǵa, onyń ishinde avtomobıl joldary qurylys materıaldarynyń qymbattaýyna baılanysty bolǵanyn atap ótken jón», - delingen mınıstrliktiń agenttik saýalyna bergen jaýabynda.
Vedomstvo málimetinshe, qazirgi ýaqytta uzyndyǵy 946 shaqyrym bolatyn «Qaraǵandy-Balqash-Almaty» jolynyń «Qaraǵandy-Balqash» (363 shaqyrym), «Balqash-Býrylbaıtal» (288), «Býrylbaıtal-Kúrti» (228) ýchaskesin jańǵyrtý jumystary júrgizilip jatyr. Joldyń 868 shaqyrymy jabynnyń tómengi qabatymen qamtamasyz etilgen. Bıyl jumystardy aıaqtaý josparlanǵan.
Al «Atyraý-Astrahan» jolynyń 60 shaqyrymy paıdalanýǵa berildi. Qalǵan 217 shaqyrymy Eýropalyq qaıta qurý jáne damý banki qarajaty esebinen júzege asyrylady. 2023 jyly 192 shaqyrym jol jańa asfaltbeton jabynymen qamtamasyz etildi. Bul jobany da osy jyly aıaqtaý josparlanyp otyr. Qazirgi ýaqytta Aqtóbe oblysynan ınertti materıaldardy daıyndaý jalǵasýda. Inertti materıaldar temirjol kóligimen jetkiziledi.
«Aqtóbe-Qandyaǵash» jolynyń 96 shaqyrymy jańǵyrtylady. 64 shaqyrymda bir baǵytta qozǵalysqa jol ashylǵan.
«Taldyqorǵan-Óskemen» jolynyń jańǵyrtýmen qamtylǵan bóligi 768 shaqyrymdy quraıdy. Búgingi kúni 748 shaqyrymynda qozǵalys ashyq. Qurylysty tolyq aıaqtaý 2024 jyldyń sońyna kózdelip otyr.
«Bul jobalardy iske asyrýdaǵy qıyndyqtar men kidirister ártúrli faktorǵa, onyń ishinde materıaldar, janar-jaǵar maı jáne joba qunynyń ósýine baılanysty boldy.
«Sondaı-aq, kidirister josyqsyz merdigerlik uıymdar tarapynan jumystardyń ýaqytyly oryndalmaýyna da baılanysty. Belgilengen merzimderdi saqtamaý jáne qurylys protsesterin júzege asyrýdaǵy tıimdiliktiń jetkiliksizdigi jumys kestelerindegi úzilisterge ákeldi. Munan bólek, máselege aıtarlyqtaı áser etetin ózge faktorǵa merdigerlik uıymdarmen kelisimsharttardy buzý kiredi. Bul jańa tenderlerdi ótkizý, qujattamany qaıta qaraý jáne qurylys is-sharalaryn qaıta josparlaý, karerlerdi qaıta resimdeý qajettiligine alyp keldi. Osyndaı ózgeristerdiń nátıjesinde qurylystyń jalpy barysyna áser etken aıaqtalý merzimderin qosymsha uzartý paıda boldy», - dedi mınıstrlikten.
