Jol salasynda 11 mlrd teńgege deıin negizsiz ulǵaıtylǵan smeta anyqtaldy
ASTANA. KAZINFORM — 2025 jyly avtomobıl joldarynyń ómirlik tsıkliniń barlyq kezeńderin qamtyǵan sybaılas jemqorlyq táýekelderine keshendi syrtqy taldaý júrgizildi. El óńirlerinde júrgizilgen is-sharalar barysynda 11 mlrd teńge kóleminde smetalyq qunnyń negizsiz ulǵaıtylýy anyqtaldy. Bul týraly Memlekettik qyzmet ister agenttigi málim etti.
Taldaý nátıjesinde josparlaý, qurylys jáne tehnıkalyq qadaǵalaý salalaryndaǵy júıeli olqylyqtardy joıýǵa baǵyttalǵan 80-nen astam usynym ázirlendi.
— Ázirleýge 23 mlrd teńge tıimsiz jumsalǵan 362 ózektiligin joǵaltqan jobalyq-smetalyq qujattama, sondaı-aq mindetti memlekettik saraptamadan ótpegen quny 27 mlrd teńgeni quraıtyn 324 nysan anyqtaldy, — delingen habarlamada.
70 kompanııanyń 408 mlrd teńgege jýyq somaǵa kelisim-sharttar alý maqsatynda jumys tájirıbesine qatysty jalǵan málimetter usyný faktileri tirkeldi.
Usynymdardy iske asyrý sheńberinde «Sybaılas jemqorlyqqa qarsy is-qımyl týraly» Zańǵa ózgerister engizilip, avtomobıl joldary obektilerinde tehnıkalyq jáne avtorlyq qadaǵalaýdy júzege asyratyn tulǵalar memlekettik fýnktsııalardy oryndaıtyn tulǵalarǵa teńestirildi.
Ulttyq jol aktıvteri sapasy ortalyǵynyń eskertýleri joıylmaıynsha joldardy paıdalanýǵa berýge tikeleı tyıym engizildi.
Salany tsıfrlandyrý maqsatynda jol-qurylys materıaldarynyń biryńǵaı aqparattyq bazasy engizildi. Bul baza naqty karerdiń sıpattamalarynan bastap zerthanalyq synaq nátıjelerine deıingi derekterge ashyq qoljetimdilikti qamtamasyz etedi.
Atalǵan platforma aqparatty ortalyqtandyrylǵan túrde jınaqtaýdy qamtamasyz etip, ónim sapasyna qatysty málimetterdi burmalaý jáne óndirýshilerdiń múddelerin lobbılaý táýekelderin boldyrmaıdy.
Qabyldanǵan sharalar 2026 jylǵa josparlanǵan 360 mlrd teńgeden astam bıýdjet qarajatynyń ashyq ári tıimdi ıgerilýin qamtamasyz etýge múmkindik beredi.
Buǵan deıin agenttik Ǵylym jáne bilim salasyna jemqorlyq táýekeli boıynsha júrgizlgen taldaý birqatar olqylyqtardy anyqtaǵan edi.
