Jol saqshylaryna 5 myń planshet kerek - Bas Prokýratýra
ASTANA. QazAqparat - Ákimshilik hattamalardyń 90 paıyzyn elektrondy túrde toltyrý úshin Qazaqstannyń jol saqshylaryna 5 myńǵa jýyq planshet kerek. QR Bas prokýratýrasynyń quqyqtyq statıstıka jáne arnaıy esepke alý jónindegi komıtetiniń tóraǵasy Baǵdat Mýsın Bas prokýratýra ǵımaratynda ótken kóshpeli otyrysta aıtyp berdi, dep habarlaıdy QazAqparat tilshisi.
««Ákimshilik óndiristerdiń biryńǵaı tizimi» týraly da aıtyp ótkim keledi. Ol ne úshin jasalady? Máselen, sotqa deıingi tergeý amaldarynyń biryńǵaı tizimi engizilgen kezde barlyq qylmystyq quqyqbuzýshylyq týraly málimetter boıynsha biryńǵaı baza jasaldy. Sol sekildi «Tsıfrly Qazaqstan» baǵdarlamasy aıasynda Ákimshilik óndiristerdiń biryńǵaı tizimi jasalady», - dedi Baǵdat Mýsın.
Onyń aıtýynsha, elimizde bul júıe boıynsha jumys jol polıtsııasynan bastalyp ketken.
«Sebebi, hattamalardyń kóbin jol polıtsııalary toltyrady. Qazirgi tańda planshetter 1 myńǵa jýyq polıtseıge taratyldy. Statıstıkaǵa qarap otyrsaq, osyǵan deıin 80 myńǵa jýyq hattama elektrondy túrde toltyrylǵan. 2018 jyly osy kórsetkishtiń 13 paıyzy elektrondy toltyrý júıesine tıesili. Bul álbette, aıtarlyqtaı jetistik emes, sebebi tek 1 myń polıtseıde ǵana planshet bar», - dedi ol.
Baǵdat Mýsın sonymen birge, qaı qalanyń polıtseıleri planshetpen ákimshilik hattamany toltyrýda kósh basynda turǵanyn atady.
«Astana, Almaty jáne Taraz qalasy - bul baǵytta aldyńǵy shepte. Ol qalada tártip saqshylary tolyqqandy planshetpen qamtamasyz etilip keledi. Statıstıkaǵa súıensek, bizdiń tártip saqshylary ákimshilik isterge qatysty hattamalardyń 90 paıyzyn elektrony túrde toltyrý úshin 5 myńǵa jýyq planshet kerek», - dedi ol.
Eske sala ketsek, buǵan deıin Baǵdat Mýsın «Elektrondy qylmystyq is» jobasy qalaı iske asyrylatynyn túsindirip bergen bolatyn.
https://kaz.inform.kz/news/bagdat-musin-elektrondy-kylmystyk-is-zhobasynyn-halykka-paydasyn-aytyp-berdi_a3225548
