Jol saqshylary Jambyl tas jolynda qaraqshylardy qolǵa túsirdi
TARAZ. QazAqparat - Jambyl oblysy ІІD jol-patrýldik polıtsııa qyzmetkerleri «Merki - Shý - Býrylbaıtal» tas jolynda birneshe qaraqshylyq shabýyl jasaǵan kúdiktilerdi qalaı ustaǵandaryn aıtyp berdi, dep habarlaıdy QazAqparat.
«3 aqpan kúni 12:00 shamasynda «Merki - Shý - Býrylbaıtal» tas jolynda maska kıgen úsh adam joldy jaýyp, «Skanııa» júk kóliginiń qozǵalysyna shekteý jasady. Osydan soń, olar Aqmola oblysy Stepnogor qalasynyń turǵyny, atalmysh júk kóliginiń júrgizýshisine shabýyl jasaǵan. Qarýmen qorqytyp, 2 myń teńgeni qoldy etken. Kóp uzamaı, «Merki - Shý - Býrylbaıtal» tas jolynyń 249-shaqyrymynda «Volvo» júk kóligin toqtatyp, júrgizýshi, Qyrǵyzstan azamatyna shabýyl jasaıdy. Qarý kezenip, aqsha suraıdy. Buǵan kelispegen júrgizýshi, kólikpen qasha jóneledi, qaraqshylar oq jaýdyryp,, artqy dóńgelekke zııan keltirgen. Jarty saǵattan soń, «Mersedes-Bents» kóligin dál osyndaı ádispen toqtatpaq bolady, alaıda buǵan moıynsunbaǵan OQO turǵyny qylmyskerlerdiń kólikterin soǵyp ótedi. Qaraqshylardyń bul áreketine yzalanǵan júrgizýshi birden Moıynqum polıtsııasyna habarlasady. Jol-patrýldik polıtsııa qyzmetkerleriniń jedel qımyly arqasynda qaraqshylardyń kóligi Balqash kóliniń jaǵasynda ustalady», - dedi Jergilikti polıtsııa qyzmeti basshysynyń orynbasary, polıtsııa polkovnıgi Samat Qusaıynov brıfıng barysynda.
Qylmyskerler «Folksvagen Golf» kóliginde bolǵany anyqtaldy. Polıtsııa qyzmetkerleriniń sózderine qulaq aspaǵan qaraqshylar qashýǵa bel baılaǵan, bir saǵattyq qýǵynnan soń, qylmyskerler qolǵa tústi. Kólikten úsh maska, 7,62 mm bolatyn 6 oq jáne 2 myń teńge kólemindegi aqsha tabyldy. Qashý kezinde kúdiktiler kólikten qarýlaryn laqtyryp jibergen. Qazirgi ýaqytta ol izdestirilýde. Ustalǵandardyń tulǵalary anyqtaldy, ekeýiniń buryn birneshe márte sottalǵany belgili bolyp otyr. 
