Jol polıtsııasynyń qyzmettik kólikterinde tájirıbe retinde beınebaqylaý júıeleri qyzmet jasaýda - Astana JPB
ASTANA. Shildeniń 29-y. QazAqparat - Búgin Astana qalalyq Іshki ister departamentiniń Jol polıtsııasy basqarmasynda departament bastyǵynyń orynbasary, polıtsııa polkovnıgi Qaırat Muhıtovtyń tóraǵalyǵymen polıtsııa qyzmetkerleriniń jumysyn baqylaý boıynsha kezekti kóshpeli qoǵamdyq keńes otyrysy ótti.
Keńeske Qoǵamdyq keńes múshelerimen qatar Jol polıtsııasynyń jeke quramy qatysty. Jıynda Jol polıtsııasy basqarmasy bastyǵynyń mindetin atqarýshy Baqytjan Malybaev «Astana qalalyq ІІD JPB-daǵy zańdylyq pen tártip jaǵdaıy, sondaı-aq sybaılas jemqorlyqqa qarsy áreket jasaý boıynsha qabyldanǵan sharalar týraly» baıandama jasap, keńes músheleriniń osy baǵyttaǵy saýaldaryna jaýap berdi. Al keńes músheleri quqyq qorǵaý organdary qyzmetkerleriniń arasynda sybaılas jemqorlyqtyń oryn alý sebepteri boıynsha óz pikirlerin ortaǵa saldy. Sondaı-aq azamattardyń avtokólikti mas kúıinde ári joǵary jyldamdyqpen júrgizýi sııaqty ákimshilik quqyq buzýshylyqtarǵa qatysty saýaldar qoıyldy.
Jol polıtsııasy basqarmasy bastyǵynyń mindetin atqarýshy Baqytjan Malybaevtyń aıtýynsha, qala ishinde patrýlde júrgen ınspektorlardyń jumysyn qadaǵalap otyrýǵa qala kóshelerinde ornalasqan 373 beınebaqylaý kamerasy múmkindik beredi. Tájirıbe retinde, ótken jyldyń shilde aıynan bastap, bir partrýldik qyzmettik kólikke óz ishinde eki arnaıy beınekamerany túıistirgen beınebaqylaý jáne anyqtaýjúıesi ornatyldy.
Paıdalaný kezinde júıe jol polıtsııasy ınspektorlarynyń jol qozǵalysy qatysýshylarymen ótkizgen 500-den astam aldyn alý áńgimelerin tirkedi. Bul qurylǵylar ınspektorlardyń óz qyzmetin atqarýyna qadaǵalaý jasaı otyryp, ınspektorlar men júrgizýshilerdiń mádenıeti men tártibin jaqsarta túsýde.
B.Malybaevtyń aıtýynsha, osy sekildi júıeler qyzmetkerler tarapynan oryn alyp qalatyn jemqorlyq qylmystardyń aldyn alýǵa da zor múmkindik beredi. Qazirgi kúni 11 qyzmettik kólikke ornatylǵan Ońtústik Koreıada shyǵarylǵan beınekameralar testileýden ótkizilýde.
