Jol polıtsııasynyń endi júrgizýshilerdi tek 8 jaǵdaıda ǵana toqtatýǵa quqy bolady
ASTANA. QazAqparat - Endigári jol polıtsııasynyń qyzmetkerleri júrgizýshilerdi tek 8 jaǵdaıda ǵana toqtala alatyn bolady. Bul týraly búgin Parlament Senatynyń jalpy otyrysynda «Jol júrisi týraly» zań jobasyn ekinshi oqylymda talqylaý barysynda málim boldy.
Ekinshi oqylym barysynda senatorlar Májilis maquldaǵan qujatqa birqatar ózgerister engizgen bolatyn. Atap aıtqanda, zań jobasynda «júrgizýshiniń agressıvti ádisi» degen uǵym alynyp tastalǵan. Óıtkeni, bul Ákimshilik quqyq buzýshylyq týraly kodeksinde qamtylyp otyr.
Budan bólek, zań jobasymen júrgizýshiniń jáne jolaýshynyń ishki ister organdarynyń qyzmetkeri toqtatqan jaǵdaıda onyń ruqsatynsyz kólik quralyn tastap ketpeý mindeti kózdeledi. Osyǵan baılanysty jol júrisi salasyndaǵy memlekettik baqylaý men qadaǵalaýdy júzege asyratyn ýákiletti organ qyzmetkeriniń júrgizýshige nemese jolaýshyǵa kólik quralynyń kabınasyn tastap ketýge ruqsat berý quqyǵy bolatyn jaǵdaılardy belgileý usynylady.
«Sonymen qatar, zań jobasynda ishki ister organdary qyzmetkeriniń kólik quralyn toqtatýǵa qatysty negizderi de qamtylyp otyr. Olar mynalar: kólik quralyn júrgizýshiniń osy zań talaptarynan týyndaıtyn jol júrisi qaǵıdalaryn buzýy, onyń ishinde tirkeý quraly tirkegen jol júrisi qaǵıdalarynyń buzylýy, aıdap áketilgen, urlanǵan kólik quraldarynyń, sondaı-aq, jol-kólik oqıǵalarynyń, kólik quraldaryn paıdalanýmen baılanysty basqa da qylmystar bolǵan jerden qashyp ketken kólik quraldaryn izdestirý jónindegi jumystar. ıAǵnı, jol polıtsııasy júrgizýshilerdi osy zań jobasynda qamtylǵan 8 jaǵdaıda ǵana toqtata alady. Budan ózge jaǵdaılarda olardy toqtatýǵa quqy bolmaıdy», - dedi senator Serik Aqylbaı.
