Jol polıtsııasynda jemqorlyq bar ekendigin moıyndaımyn - Qasymov
ASTANA. QazAqparat - Qazaqstannyń jol polıtsııasy 100 paıyz vıdeotirkeýshi quralmen qamtylýy kerek. Bul týraly búgin QR Parlamenti Senatynda ótip jatqan «Jol qozǵalysy salasyndaǵy quqyqtyq retteýdiń jaı-kúıi men problemalary» taqyrybyndaǵy parlamenttik tyńdaý barysynda elimizdiń Іshki ister mınıstri Qalmuhanbet Qasymov málim etti, dep habarlaıdy QazAqparat.
Parlamenttik tyńdaý barysynda senator Sergeı Ershov mınıstrden jol polıtsııasy arasyndaǵy jemqorlyqtyń joǵary ekendigin aıta kele: «Ókinishke oraı, siz ózińizdi baıandamańyzda bul máselege toqtalmadyńyz. Іshki ister mınıstrligi jemqorlyq deńgeıin tómendetý úshin qandaı sharalar qoldanýda?» - dep surady.
Qasymov óz sózinde jol-patrýldik qyzmettiń shtat sanynyń úlkendigin, 12 myń polıtsııa qyzmetkeri bar ekendigin atap ótti.
«Biz ózindik qaýipsizdik qyzmetimen olardyń qyzmetterine tekserý júrgizemiz. Shynymen de bul qyzmette jemqorlyqqa qatysty faktiler kóp. Buǵan qosa, jemqorlyqqa qarsy qyzmet, ıaǵnı, qarjy polıtsııasy da tekserý júrgizedi. Bar, biz muny moıyndaımyz», - dedi ol.
Sonymen qatar mınıstr jol polıtsııasy qyzmetkerlerin irikteý qatań júrgiziletindigin, olarǵa kúndelikti baqylaý jasalatynyn aıtty.
«Qazirgi ýaqytta biz tehnıkalyq quraldar, vıdeotirkeý quraldaryn engizip jatyrmyz. Biz polıtsııa qyzmetkerlerimiz, zań buzýshymen qalaı sóılesip, qalaı jumys istep jatqanyn kórip otyrý úshin 100 paıyz vıdeotirkeý quraldarymen qamtylǵanyn qalaımyz», - dedi Qasymov.
Onyń aıtýynsha, jol polıtsııa qyzmetkerleriniń jalaqysy, baspanamen qamtylý deńgeıi tómen. Sondyqtan mınıstrlik bul máseleni sheshý sharalaryn qarastyrýda. Jergilikti ákimdikter de polıtsııa qyzmetkerlerin jaldamaly jataqhanalarmen qamtý máselesine qol ushyn berse durys bolar edi.
«Biz bul qyzmettegi jemqorlyq kórinisterin túbegeıli joıý úshin qatań sharalar qoldanatyn bolamyz»,- dedi Qasymov.
