Jol polıtsııasy qyzmetkerlerin qoǵamdyq kólikter men memlekettik menshiktegi jeke kólikterdiń júrgizýshileri alańdatyp otyr
ASTANA. 1 qarasha. QazAqparat /Aıdar Ospanalıev/ - Qoǵamdyq kólikter men memlekettik menshiktegi jeke kólikterdiń júrgizýshileriniń áreketteri jol polıtsııasy qyzmetkerleriniń alańdaýshylyǵyn týdyrýda. Búgin jýrnalıstermen brıfıng ótkizgen Іshki ister mınıstriginiń Jol polıtsııasy komıtetiniń tóraǵasy Qaırat Tynybekov keltirgen málimetterdiń qorytyndysy osyndaı.
Komıtet tóraǵasynyń sózinshe,18-25 qazan aralyǵynda júrgizilgen «Qaýipsiz jol» jedel-saýyqtyrý sharasynyń barysynda osy máselege basa nazar aýdarylǵan. Júıeli júrgizilgen jumystyń nátıjesinde 4 myń 941 jolda júrý erejesin buzý áreketi anyqtaldy. Onyń 1 myń 762-i memleket menshigindegi jeńil kólikterdiń ıeleriniń úlesinde. «Eń soraqysy elimizde qoǵamdyq kólikti mas kúıinde júrgizgen 25 adam ustaldy. Al jolaýshylardy tasymaldaý erejelerin buzǵandar - 852. Qoǵamdyq kólikti zańsyz túrde jabdyqtaý - 368. Sondaı-aq tártip saqshylarynyń quryǵyna ilingen 1 myń 341 kólikten aqaý tabyldy. 565 avtobýstyń júrýine tyıym salynyp, kólik qyzmetimen aınalysatyn uıym-mekemelerdiń 276 ókili ákimshilik jaýapqa tartyldy», - dedi komıtet tóraǵasy.
Onyń aıtýynsha, jyl boıyna jol erejesin birneshe márte buzǵany úshin 615 júrgizýshi jáne 106 avtobýs júrgizýshileriniń jolda júrý erejesin bilý deńgeıleri tekserildi.
