Jol polıtsııasy halyq úshin elektrondyq qyzmet aýqymyn keńeıtýde
ASTANA. 21 qyrkúıek. QazAqparat - Jol polıtsııasy halyq úshin elektrondyq qyzmet aýqymyn keńeıtýde, dep habarlady QR ІІM Jol polıtsııasy komıtetiniń baspasóz qyzmetinen.
Vedomstvonyń atap ótýinshe, 2010 jyldyń qarasha aıynda Іshki ister mınıstrligi Baılanys jáne aqparat mınıstrligimen birlesip jol polıtsııasynyń «Baqylaý» aqparattyq júıesi negizinde jol qozǵalysy erejelerin (beıne baqylaý jáne tirkeý júıesimen túsirilgen aıyppuldardan basqa) buzǵany úshin ákimshilik aıyppuldardy «elektrondy úkimet» portaly arqyly tóleý tetigin iske asyrdy.
Aıyppuldardy tóleýdiń dástúrli túri jol qozǵalysyn buzýshylarǵa tanys. Tóleý úshin eki kezekte turý kerek - bankte jáne ákimshilik tájirıbe bólimshesinde. Al «elektrondy úkimet» portaly arqyly tóleý, sózsiz, osy rásimdi jeńildetedi. Sebebi, osylaı tólengen aıyppuldar týraly habarlamalar avtomatty túrde jol polıtsııasy bólimshelerine baǵyttalady.
«Qazirgi ýaqytta Jol polıtsııasy komıtetimen «Baqylaý» aqparattyq júıesi jáne óńirlik protsessıng ortalyqtarymen beıne baqylaý jáne tirkeý júıesimen túsirilgen buzýshylyqtardy óńdeý boıynsha birigý jumystary júrýde jáne osy júıelermen túsirilgen quqyq buzýshylyqtardy elektrondyq úkimet shlıýzi arqyly tóleýge múmkindik beredi. Osyndaı múmkinshilik kólik ıelerinde 2011 jyldyń sońynda paıda bolady. Sondaı-aq, halyqty osy qyzmet túrimen keńirek qamtý maqsatynda, qoǵamdyq oryndarda ornatylǵan elektrondy termınaldar arqyly qolma-qol tóleý kómegimen jol qozǵalysy erejelerin buzǵany úshin aıyppuldardy tóleý múmkindikterin iske asyrý máseleleri, sonymen qatar aıyppuldardy bankomat arqyly jáne ekinshi dárejeli bankterdiń ROS-termınaldary arqyly tóleý múmkindikterin iske asyrý máseleleri qarastyrylýda», - delingen habarlamada.
