Jol polıtsııasy basqarmasy Salyq kodeksi men «Jol qozǵalysy qaýipsizdigi týraly» Zańyna ózgerister men tolyqtyrýlar engizilgendigin eskertedi
ASTANA. Qańtardyń 10-y. QazAqparat - Astana qalasy Іshki ister departamentiniń Jol polıtsııasy basqarmasy barlyq kólik ıelerin, ústimizdegi jylǵy qańtardyń 1-inen bastap salyq salý máseleleri boıynsha birqatar zańnamalyq aktilerge engizilgen ózgerister men tolyqtyrýlar zańdy kúshine engendiginen habardar etedi,
dep habarlaıdy QazAqparat Basqarmanyń baspasóz qyzmetine silteme jasap.
Osy rette, QR Salyq kodeksiniń 369-shy babyna sáıkes kólik quraldary bar jeke tulǵalar úshin bıýdjetke salyq tóleý merzimi jeltoqsannyń 31-ine deıin belgilendi. Salyqty tóleý salyq salynatyn nysandardyń tirkelgen jeri boıynsha júzege asyrylady.
Sondaı-aq, «Jol qozǵalysy qaýipsizdigi týraly» QR Zańyna engizilgen ózgeristerge sáıkes, 18-shi baptyń 3-shi tarmaǵynda - jeke tulǵalardyń kólik quraldaryn tirkeý jáne qaıta tirkeý, aǵymdaǵy jyly atalmysh kólik quraldaryna salyqtyń tólengendigin rastaıtyn qujattardy usynǵannan keıin ǵana júzege asyrylatyndyǵy jazylǵan.
Sonymen qatar, atalmysh Zańnyń 19-shy baby, 3-shi tarmaǵyna sáıkes, kólik quraldaryn tehnıkalyq baıqaýdan ótkizýge qatysty ózgerister engizilip otyr. Máselen, mehanıkalyq kólik quraldary men onyń tirkemelerine memlekettik baıqaý, tehnıkalyq baıqaýdan ótý týraly kýálikti alýǵa tólengen mindetti memlekettik salyqtyń, sondaı-aq aǵymdaǵy jylǵa kólik salyǵynyń tólengendigin rastaıtyn qujattardy usynǵannan keıin ǵana júzege asyrylady.
Bir birlik kólik quraly úshin tólemder 707 teńgeni quraıdy.
