Jol polıtseılerine alataıaqty qaıtarý usynyldy
ASTANA. QazAqparat - Búgin Parlament Senatynyń jalpy otyrysynda senator Georgıı Kım jol polıtseılerine alataıaqty qaıtarý máselesin kóterdi. Osy oraıda Úkimet basshysy Asqar Mamınniń atyna depýtattyq saýal joldandy, dep habarlaıdy QazAqparat tilshisi.
Atalǵan depýtattyq saýalǵa senatorlardyń óńirlerdegi kezdesýi kezinde kótirilgen máseleler, sonymen qatar qozǵalysty retteý barysynda jol-patrýldik polıtsııa qyzmetkerlerin qaǵyp ketý sekildi oqıǵanyń tirkelýi statıstıkasy da negiz boldy.
«Osyǵan baılanysty tek joldaǵy qozǵalysty retteý úshin alataıaqty (jezl) paıdalaný durystyǵyn qarastyrý usynylady», - dedi G. Kım.
Esterińizge sala keteıik, 2017 jyldyń 1 qańtarynan bastap Іshki ister organdarynyń qyzmetkerleri kólikterdi toqtatý úshin arnaıy taıaqsha qoldanbaı keledi. 2017 jylǵa deıin qoldanylyp kelgen polıtseılerdiń alataıaqtary jınaqtalyp, arnaıy saqtaý úshin qoımalarǵa jiberilgen.
Atap aıtqanda, buǵan deıin QR Parlamenti Senatyndaǵy parlamenttik tyńdaýda kóshe qıylysynda qozǵalysty retteıtin polıtseılerge alataıaqtardy qaıtaryp berý usynysy aıtylǵan edi. Ásirese, bul alataıaqtardyń túngi ýaqytta qajettigi sóz boldy.
Sonymen qatar 2017 jyldyń kúzinde QR Іshki ister mınıstrligi polıtseılerge alataıaq qaıtarylmaıtynyn atap ótti.
