Jol-patrýl kóligine minip, qaljyńdaǵan almatylyq qamalýy múmkin
ALMATY. QazAqparat - Almatyda jol-patrýl kóliginiń kapotyna otyryp sýretke túsip, ony Instagram jelisinde balaǵat pikirimen jarııalaǵan 23 jastaǵy almatylyq qylmystyq jaýapkershilikke tartyldy, dep habarlaıdy QazAqparat tilshisi.
ІІD qyzmetkerleri monıtorıng júrgizý barysynda áleýmettik jelidegi jigittiń sýretin kórip, ony zańbuzýshylyq sanatyna jatqyzǵan.
«Áleýmettik jelidegi jeke paraqshasynda jas jigit polıtsııa jol-patrýl kóliginiń kapotyna otyryp túsken sýretin jarııalaǵan. Sýrette ol qolyna syra ustap, ortańǵy suq saýsaǵyn shoshaıtyp, aǵylshyn tilinde boqtyq sózin jazǵan. Onymen qoımaı, sol baǵyttaǵy «heshteg» jalǵaǵan. Qoǵamǵa taralǵan bul sýret bizdiń nazarymyzdan tys qalmady. Fakt boıynsha, QR QK 378-babynyń 2-tarmaǵyna sáıkes is qozǵaldy. Sýrettiń jáne posttyń avtory M esimdi turǵyn óz kinásin tolyǵymen moıyndady. Ol bul áreketke mas bolǵandyqtan barǵanyn aıtyp, aqtaldy. Alaıda, bul syltaýy ony qylmystyq jaýapkershilikten bosatpaıdy. Ol mundaı áreketke jurttyń nazaryn aýdarý úshin barǵanyn da aıtty», - deıdi ІІD Anyqtaý basqarmasynyń basshysy Rústem Ábdirahmanov.
Polıtseılerdiń eskertýinshe, eger kimde-kim qyzmet babynda nemese qyzmet babyna baılanysty bılik ókilderin mazaq etse, 100 aılyq eseptik kórsetkish (AEK) kóleminde aıyppul tóleıdi nemese 120 saǵat qoǵamdyq jumysqa jegiledi nemese 5 táýlikke qamalady.
Polıtseıdiń aıtýynsha, M esimdi turǵynnyń bul qylmystyq áreketi BAQ nemese telekomýnıkatsııa júıesi arqyly jasalǵandyqtan qatańyraq bolmaq. Sot endi ony 300 AEK kóleminde aıyppul tóleýge nemese 240 saǵat qoǵamdyq jumys jasaýǵa nemese 75 táýlikke qamaýy múmkin.
