Jol nysandaryna keltirilgen zaqymnyń saldarynan bolǵan nuqsannyń somasy 1,7 mlrd. teńgeni qurap otyr
ASTANA. Naýryzdyń 25-i. QazAqparat /Ernur Aqanbaı/ - Bıylǵy qys mezgilinde aýa raıynyń qolaısyzdyǵynan respýblıkamyzdaǵy jol nysandaryna keltirilgen zaqymnyń saldarynan bolǵan nuqsannyń somasy 1,7 mlrd. teńge bolyp otyr,
dep habarlaıdy QazAqparat QR Kólik jáne kommýnıkatsııa mınıstrliginiń baspasóz qyzmetine silteme jasap.
«Mol jáne úzdiksiz jaýyn-shashyn men aýa raıynyń kúrt ózgerip otyrýy saldarynan bıylǵy kóktem biraz óńirlerdegi kólik qatynasynyń qıyndaýyna ákelip soqty. Respýblıkalyq qatynastaǵy avtojoldardyń ishinde Shyǵys Qazaqstan jáne Almaty oblystaryndaǵy joldar edáýir zardap shekti. Batys Qazaqstan, Jambyl, Qaraǵandy oblystaryndaǵy úıilgen qardyń qalyńdyǵy men sý tasqyndary avtokólikterdiń qozǵalysyna edáýir qıynshylyqtar týǵyzdy. Osy jaǵdaılardyń saldarynan naýryzdyń 24-degi jaǵdaı boıynsha respýblıkamyzda 29 jol nysanyna zaqym keldi. Onyń ishinde Almaty jáne Shyǵys Qazaqstan oblystarynda 2 kópir, 4 kópirge kireberis, sonymen qosa 3 qubyr shaıylyp ketti. Tasqyn sýdyń zardabynan avtomobıl joldarynyń 20 ýchaskesi buzyldy. Aldyn ala esepterge qaraǵanda (24.03.10 j. kúngi málimet boıynsha) keltirilgen nuqsannyń somasy 1,7 mlrd. teńge bolyp otyr», delingen baspasóz qyzmetiniń taratqan habarlamasynda.
Baspasóz qyzmetiniń málimetinshe, ortalyqtan bólinip qalǵan eldi mekender kóbine-kóp jalǵyz baılanys býyny bolǵandyqtan, árbir búlingen ýchaskeniń mańyzdylyǵyn eskere otyryp, Kólik jáne kommýnıkatsııa mınıstrliginiń jol kásiporyndary bir jaǵynan jol boıyn úıme qardan tazartýmen, ekinshi jaǵynan shaıylyp ketken ýchaskelerdi qalpyna keltirýmen táýlik boıy shuǵyldanýda. Jedel shara qoldaný maqsatynda QR Kólik jáne kommýnıkatsııa mınıstrliginde shuǵyl shtab qurylyp, dıspetcherlik qyzmet jumys jasaýda (7172) 24-36-06. Sý tasqyny qaýpi bar jerler men shaıylyp ketýi yqtımal ýchaskeler anyqtaldy. Sý tasqyny merzimi boıyna respýblıkalyq mańyzy bar 563 ýchaske baqylaýǵa alyndy.
