Jol qurylysyndaǵy kompanııalar qatary kóbeıedi - mınıstrlik

NUR-SULTAN. QazAqparat – Memlekettik satyp alýǵa qatysa alatyn jol qurylysyndaǵy kompanııalar qatary keńeıtiledi. Bul týraly Indýstrııa jáne ınfraqurylymdyq damý mınıstrligi baspasóz qyzmetinen málimdedi, dep habarlaıdy QazAqparat tilshisi.

«Memlekettik satyp alý týraly Zańǵa sáıkes, áleýetti qatysýshyǵa qoıylatyn birqatar krıterıı bar. Atap aıtsaq, áleýetti qatysýshynyń lıtsenzııadan basqa, tájirıbesi, qarjylyq ári materıaldyq resýrstary bolýy kerek», - delingen mınıstrliktiń QazAqparat agenttigine bergen jaýabynda.

Sonymen qatar, bul kompanııalar buǵan deıin tapsyrysty iske asyra almaǵandar tiziminde bolmaýy qajet.

«Jalpy, Qazaqstanda tıisti múmkindigi bar jáne konkýrstarǵa turaqty qatysatyn kompanııalar bar. Barlyq konkýrstar ólshemsharttar boıynsha irikteý negizinde ótkiziledi. Onda mol tájirıbesi bar jáne jaqsy baǵa jeńildigin málimdegen kompanııa jeńimpaz bolyp tańdalady. Memleket basshysynyń tapsyrmasyna baılanysty mınıstrlik Qarjy mınıstrligimen birlesip, sybaılas jemqorlyq táýekelderin azaıtý jáne jumys naryǵyn monopolııasyzdandyrý boıynsha jumysty kúsheıtetin bolady. Sondaı-aq, Memlekettik satyp alýǵa qatysa alatyn jol qurylysy kompanııalarynyń qatary da keńeıtilmek», - dep atalyp ótken vedomstyo málimetinde.

Budan buryn habarlanǵandaı, bıyl Úkimettiń keńeıtilgen otyrysynda Prezıdent jol salasynda teńderdi jyl saıyn birdi-ekili kompanııa ǵana utyp alatynyn synǵa aldy.

Sonymen qatar Memleket basshysy elimizdiń joldary nashar ekeni jáne jol qurlysy salasyn jemqorlyq jaılaǵany týraly aıtty.