Jol qurylysyna arnalǵan otandyq nanotehnologııa tanystyryldy
«Elbasy tapsyrmasyna sáıkes, otandyq ónimderdiń qataryn arttyrý maqsatynda bizdiń ınstıtýt birqatar tyń zertteýlerdi qolǵa aldy. Sonyń biri usaqtalǵan kómirden alynatyn nanountaq,ony bıtýmǵa qosyp asfalt sapasyn edeáýir joǵarylatýǵa bolatynyn dáleldep shyqtyq. Bul jańashyldyqty oılap shyǵarýǵa ınstıtýt qyzmetkerleri bir jylǵa jýyq eksperıment jasap, eńbektendi. Sonyń nátıjesin búgin kórmede tanystyrýdamyz. Nanountaq jańashyldyǵynan bólek, joldarynyń sapasyn arttyrýmen qatar, jol qurylysyna jumsalatyn qarjyny únemdeýge mol septigin tıgizedi», - dedi Qazaqstan jol ǵylymı- zertteý ınstıtýty AQ-nyń prezıdenti Baǵdat Teltaev.
Onyń aıtýynsha, quramynda nanountaǵy bar asfaltbetondyq qospa tóselgen avtojol aýa temperatýrasynyń tómen nemese joǵary bolýyna qaramastan uzaq jyldarǵa paıdalanýǵa múmkindik beredi.
«Jol qurylysy salasyndaǵy bul jańashyldyqty oılap tabýda tolyǵymen otandyq ónimder qoldanyldy. Jáne aldaǵy ýaqytta elimizdiń naryǵyna shyǵarýdy josparlap otyrmyz, - dedi ol.
Odan bólek, B.Teltaev elimizdiń búgingi avtojol jaǵdaıy týraly da sóz etti. «Avtomobıl joldary únemi bılik pen halyq nazarynda jáne ol birqalypty damý ústinde deýge bolady, paıyzdyq kórsetkishpen aıtsaq, avtojoldardyń 40% jaqsy, 30% qanaǵattanarlyq, qalǵan 30% nashar jaǵdaıda. Baıqasańyzdar, memleket atalǵan salaǵa kóńil bólip, tıisti sharalardy qolǵa alýda, oǵan dálel Elbasy óziniń bıylǵy joldaýynda jergilikti mańyzy bar avtomobıl joldaryn jóndeý úshin Úkimetke 150 mlrd teńge qarajat bólýdi tapsyrdy»,- dedi Qazaqstan jol ǵylymı- zertteý ınstıtýtynyń basshysy.
Eske salsaq, Astanada kesheden beri jol qurylysyna arnalǵan halyqaralyq kórme ótýde.
Odan bólek, kórme aıasynda óńirlik joldardy damytý máselesine arnalǵan konferentsııa ótti.
