Jol qurylysyn jobalaýǵa jaýapsyz qaraıtyn mekemelerdiń «qara tizimi» túzilmek

NUR-SULTAN. QazAqparat – Avtomobıl joldary komıteti jol salasyndaǵy jobalaýshy uıymdardyń jaýapsyzdyǵy úshin qoldanylatyn jazany qatańdatty. Attestattaýshy sarapshylardyń pikirleri basty nazarǵa alynyp, jaýapsyz kompanııalar óz isine salǵyrt qaraıtyn mekemeler sanatyna kirgiziledi, dep habarlaıdy QazAqparat QR IIDM baspasóz qyzmetine silteme jasap.

«Bul sheshim óz nátıjesin berip te úlgerdi. Máselen, «Atyraý - Oral» baǵytyndaǵy jobany júzege asyrýshy merdiger jańa sheshim paıdalanýdy qarastyryp jatyr. Bul joba jańa aınalma joldy salý kezinde burynǵy joldardy paıdalanyp, kólik qozǵalysy kezindegi jolaq enin 20 metrden 120 metrge deıin arttyrýdy qamtamasyz etedi. Bul sheshimder AQSh-ta keńinen qoldanylyp, óziniń tıimdiligin dáleldegen», - delingen mınıstrlik habarlamasynda.

Avtomobıl joldary komıtetiniń málimetinshe, elimizde keıingi jyldary avtokólik joldarynyń qurylysy men rekonstrýktsııa júrgizý boıynsha jobalar sapasyna syn kóp.

«Atap aıtqanda, aýdannyń klımattyq erekshelikterine baǵdarlanǵan tehnıkalyq sheshimder tıisti deńgeıde nazarǵa alynbaıdy, kópirler men ózge de nysan qurylysynda paıdalanylatyn materıaldar men olardy salý tehnologııasyna jete mán berilmeıdi. Sonymen qatar, jobalaýshy kompanııalar kóp jaǵdaıda jol qurylysy jumystarynda arnaıy kıimderdi paıdalanbaıdy.

Jeke jobalaýshy uıymdar jol qurylysy men rekonstrýktsııalaý kezinde qaýipsizdik pen nysandardyń beriktik qasıetin uzaq ýaqyt qamtamasyz etetin ınnovatsııalyq sheshimderdi engizýge qulyqty emes. Kóptegen jobalyq sheshimderdiń sapasy syn kótermeıdi, tipti «QazJolǴZI» AQ usynǵan joǵary nátıjeli ǵylymı tabystardy óndiris barysynda esepke almaıdy jáne qoldanbaıdy. Jobalaýshy kompanııalar buǵan deıin qoldanylyp kelgen tıptik sheshimderge basymdyq beredi. Bul sheshimder qosymsha dáleldemelerdi qajet etpeıdi», - dep tolyqtyrady mınıstrlikten.

Buǵan deıin habarlaǵanymyzdaı, 2014 jyldan beri Qazaqstandaǵy jol qurylysynyń baǵasy úsh ese tómendegen.

Sondaı-aq, avtojoldardyń sapasyna qatysty ákimdikter reıtınginiń ádistemesi bekitilmek.