Jol-qurylys materıaldarynyń sapasyn zerthanada tekserýge degen suranys artqan
ASTANA. QazAqparat - Qazaqstan jol ǵylymı-zertteý ınstıtýtynyń qyzmetkerleri jol-qurylys materıaldarynyń sapasy men qasıetterin zerthanada tekserýge degen suranystyń artqanyn aıtady, dep habarlaıdy QazAqparat.
Osylaısha jyl basynan 30 sáýirge deıin jol salasyndaǵy uıymdardyń ótinimderi negizinde 199 synama zertteýden ótken. Onyń ishinde 25 bıtým jáne gýdron, 35 qıyrshyqtas, 38 asfaltobeton tóseminiń ózegi jáne basqa da materıaldar bar. Bul ótken jyldyń birinshi jartyjyldyǵyndaǵy kórsetkishten 2 ese kóp.
«Bıyl zerthanamyzǵa ótinimder kóbirek túse bastady. Biz bul úrdisti Memleket basshysynyń joldardyń sapasyn arttyrý jaıly tapsyrmasymen baılanystyramyz. Óz kezeginde tapsyrys berýshiler men merdigerler qurylys materıaldaryn synaý jumystaryna kóbirek kóńil bóle bastady. Sonymen qatar elimizdegi jalǵyz salalyq ınstıtýttyń zerthanasy retinde biz zamanaýı jabdyqtardyń barynsha jańa úlgilerimen qamtamasyz etýge tyrysamyz», dep atap ótti Qazaqstan jol ǵylymı-zertteý ınstıtýtyndaǵy synaq zerthanasynyń jetekshisi Meıramgúl Qabdyǵalıeva.
Zerthana jol ǵylymynyń mańyzdy bóligi sanalady. Osy rette avtomobıl joldarynyń sapasy, eń aldymen, naqty ýchaskelerde qoldanylatyn qurylys materıaldary men tehnologııalarǵa tikeleı baılanysty.
«Tipti durys salynǵan joldyń ózi jobalaý kezeńinde komponentter durys tańdalmaǵan bolsa, buzyla bastaýy ábden múmkin», dep atap ótti M.Qabdyǵalıeva.
Búgingi tańda «QazjolǴZI» AQ zerthanalary túrli jol-qurylys materıaldary men tehnologııalaryn synaqtan ótkizip jatyr. Atalǵan komponentter qysym men klımattyq jaǵdaılardyń áserinen sapasy men turaqtylyq syndy qasıetteri boıynsha tekseriledi.
Jol-qurylys materıaldary men jańa tehnologııalardyń biryńǵaı bazasyn qurý sheńberinde Qazaqstan jol ǵylymı-zertteý ınstıtýtynyń zerthanasy jyl basynan beri otandyq karerlerden alynǵan synamalar men materıaldardy zerttep keledi. Instıtýt búgingi deıin 151 jol-qurylys materıalyn synaqtan ótkizgen: 90 tas jáne 10 qum materıaldary, 12 qıyrshyq tas-qum qospalary jáne basqa da komponentter.
Esterińizge sala keteıik, atalǵan elektrondyq baza Qazaqstannyń ártúrli klımattyq aımaqtarynda jol jabyndarynyń qurylysy úshin paıdalanylatyn materıaldardy daıyndaý úshin qolaıly komponentterdi esepke alý jáne izdeý jumystaryn jeńildetý maqsatynda ázirlenip jatyr.
