Jol qurylysynda jergilikti kompanııalarǵa basymdyq beriledi - mınıstrlik

ASTANA. KAZINFORM – Endi avtojol salý kezinde jumystyń 30 paıyzyn ǵana qosalqy merdigerge alýǵa bolady. Bul týraly QR Qarjy vıtse-mınıstri Dáýren Keńbeıl málim etti.

Mundaı normalar memlekettik satyp alý týraly jańa zańda qamtylǵan. Sonymen qatar, jergilikti kompanııalarǵa qoldaý jasalady.

«Biz jumys oryndalatyn jerde eńbek jáne materıaldyq resýrstardyń bolýyna talaptar belgiledik. ıAǵnı, Aqmola oblysynda jol qurylysy júrgizilse, onda tapsyrys berýshi konkýrstyq qujattamada Aqmola oblysy boıynsha osy tapsyrysty oryndaýshyda tıisti bazanyń, materıaldy ári eńbek resýrstarynyń bolýy týraly talabyn qoıa alady. Osy oraıda bul kompanııaǵa bir ball beriledi jáne osynyń ózi úlken qoldaý bolady. Eger kompanııa belgili bir aımaqta bir jyldan astam tirkelgen bolsa, onda ol bir upaıǵa jýyq jeńildik alady», - dedi D. Keńbeıl Parlament Májilisinde tilshiler suraǵyna jaýap bere otyryp.

Onyń sózine qaraǵanda, qosalqy merdigerlikke beriletin jumys kólemi aıqyndaldy.

«Eger qoldanystaǵy zańnamada 50 paıyz bolsa, endi 30 paıyzdan asyrmaýy tıis ekenin engizdik», - dep túsindirdi vıtse-mınıstr.

Budan buryn habarlanǵandaı, búgin Parlament Májilisi «Memlekettik satyp alý týraly» Zańyn ekinshi oqylymda qarap, qabyldady.