Jol qurylysynda tehnogendi-mıneraldy túzilimderdi paıdalaný jospary bekitildi
ASTANA. KAZINFORM – Kólik mınıstrligi jol jobalarynda tehnogendi-mıneraldy túzilimderdi qoldaný kólemin arttyrýǵa baǵyttalǵan is-sharalar josparyn bekitti.
Jospar aıasynda tehnogendik mıneraldyq túzilimderdi (TMT), ıaǵnı taý-ken óndirý, taý-ken-qaıta óńdeý jáne energetıkalyq óndiristerdiń paıdaly quraýyshtary jáne paıdaly qazbalary bar qaldyqtarynyń shoǵyryn jol qurylysyna paıdalaný boıynsha keshendi sharalardy júzege asyrý kózdelgen.
Sarapshylardyń aıtýynsha, qaıta óńdelgen tehnogendi shıkizatty qoldaný ınfraqurylymdyq jobalardyń qunyn tómendetip qana qoımaı, qorshaǵan ortaǵa ekologııalyq júktemeni edáýir azaıtýǵa múmkindik beredi.
— Qaıta óńdelgen qaldyqtardy jol salý jáne jóndeý jumystaryna tıimdi qoldanýǵa bolady. Mundaı materıaldar sapasy jaǵynan dástúrli materıaldardan kem túspeıdi. Bul — bárine tıimdi sheshim: memleket shyǵyndy azaıtady, kásiporyndar qaldyqtardy kádege jaratý máselesin sheshedi, al qorshaǵan orta tazarady, — dep atap ótti «QazjolǴZI» AQ vıtse-prezıdenti Erik Ámirbaev.
Ǵalymdar jospardyń tıimdi iske asýy úshin qaıta óńdelgen materıaldardy qoldaný boıynsha tıisti talaptardy zańnamada bekitý qajet ekenin alǵa tartady. Sonymen qatar, qaldyqtardy óńdeýmen aınalysatyn kásiporyndarǵa salyqtyq jeńildikter men yntalandyrý sharalaryn qarastyrý usynylady.
Qazirgi ýaqytta óńirlerde óndiristik shıkizatty ǵylymı zertteý jumystary bastaldy. Mysaly, Pavlodar jáne Qaraǵandy oblystarynda óndiristik qaldyqtardy jol salý salasynda paıdalaný múmkindigin keshendi baǵalaý jumystary júrgizilýde. Zertteý nátıjeleri boıynsha usynylatyn materıaldardyń tizimi jasaqtalyp, olardy jol-qurylys materıaldarynyń Biryńǵaı bazasyna engizý kózdelýde.
Aıta ketý kerek, óndiristik qaldyqtardy qurylys salasynda qaıta óńdep qoldaný álemdik tájirıbede keńinen qoldanylatyn tıimdi tásil. Ol bir ýaqytta birneshe mańyzdy mindetti sheshýge múmkindik beredi: tabıǵı resýrstardy únemdeý, qurylys shyǵyndaryn azaıtý, qorshaǵan ortaǵa teris áserdi tómendetý jáne qaldyqtardy qaıta óńdeý naryǵyn damytý.
Eske salsaq jol qurylysy salasynda qandaı mamandar jetispeıtini týraly jazǵan edik.