Jol qurylysyna qoıylatyn talap kúsheıdi: merdigerler 1 mlrd teńgeniń jumysyn qaıta oryndady
ASTANA. KAZINFORM - 2025 jyly Jol aktıvteri sapasynyń ulttyq ortalyǵynyń jumystar men materıaldardyń sapasyna saraptama júrgizýdi uıymdastyrý qaǵıdalaryna avtomobıl joldaryn salý, rekonstrýktsııalaý jáne jóndeý obektilerin paıdalanýǵa berý kezinde Sapa ortalyǵynyń anyqtalǵan eskertýleri tolyq joıylmaıynsha obektini qabyldaýǵa tyıym salatyn norma engizildi. Alǵashqy nátıjeler bul talaptyń tıimdiligin kórsetti.
Kólik mınıstrligi baspasóz qyzmetiniń habarlaýynsha, normany qoldanýdyń birinshi jylynyń qorytyndylary jol qurylysy sapasynyń artqanyn jáne merdiger uıymdardyń jaýapkershiligi kúsheıgenin baıqatady.
2025 jyldyń qorytyndysy boıynsha merdigerler anyqtalǵan aqaýlardy joıyp, óz qarajaty esebinen 1 mlrd teńge kólemindegi jumystardy qaıta oryndady.
Salystyrmaly túrde alǵanda, bul kórsetkish 2023 jyly 4,1 mlrd teńgeni, al 2024 jyly 3,9 mlrd teńgeni quraǵan. Bul rette anyqtalǵan aqaýlar oblystyq jáne aýdandyq mańyzy bar avtomobıl joldaryn jańartý jobalarynda tirkeldi.
Qaıta oryndalǵan jumystar kóleminiń edáýir qysqarýy jol qurylysy barysynda talapqa sáıkessizdikter men aqaýlar sanynyń azaıǵanyn kórsetedi. Merdiger uıymdar tehnologııalyq talaptardy saqtaýǵa jáne oryndalatyn jumystardyń sapasyna kóbirek kóńil bóle bastady, óıtkeni anyqtalǵan eskertýler joıylmaıynsha obektini paıdalanýǵa berý múmkin emes.
Qoldanystaǵy qaǵıdalar avtomobıl joldaryn salýdyń, rekonstrýktsııalaýdyń jáne jóndeýdiń barlyq kezeńinde sapa saraptamasyn júrgizýdi kózdeıdi. Bul rette Jol aktıvteri sapasynyń ulttyq ortalyǵy anyqtaǵan barlyq eskertýler tolyq joıylǵannan keıin ǵana obektini qabyldaýǵa jol beriledi.
- Osylaısha, atalǵan norma joıylmaǵan aqaýlary bar joldardy paıdalanýǵa berýge jol bermeıdi jáne merdiger uıymdarǵa qoldanystaǵy sharttyq mindettemeler sheńberinde anyqtalǵan zańbuzýshylyqtardy joıý boıynsha tikeleı jaýapkershilik júkteıdi,-delingen habarlamada.
Osyǵan deıin Qazaqstanda jol qurylysyna arnalǵan tsementterdiń sapasy zerttelip jatqany týraly jazdyq.
