Jol qurylysyna arnalǵan 191 tehnologııa tsıfrlyq biryńǵaı bazaǵa tirkeldi
ASTANA. KAZINFORM — Qazaqstanda avtomobıl joldaryn salý jáne kútip-ustaýǵa arnalǵan materıaldar men jańa tehnologııalardy biriktiretin rcmbase.qazjolgzi.kz tsıfrlyq platformasyn jańǵyrtý jalǵasady. Bıylǵy jyldyń 1 jeltoqsandaǵy málimet boıynsha, biryńǵaı bazaǵa jol jabynynyń tózimdiligin, turaqtylyǵyn jáne qaýipsizdigin arttyrýǵa arnalǵan 191 tehnologııa engizilgen. Bul týraly Kólik mınıstrligi málim etti.
rcmbase.qazjolgzi.kz platformasynyń jikteý júıesi tehnologııalardyń naqty obektilerde qoldanýǵa qanshalyqty daıyn ekendigin baǵalaýǵa múmkindik beredi. Onyń ishinde:
- 60 tehnologııa praktıkalyq qoldanysqa usynylǵan;
- 28 tehnologııa jetildirý jáne tájirıbelik qoldaný kezeńinde;
- 96 tehnologııa qosymsha synaqtan ótýdi talap etedi;
- 7 tehnologııa shekteýli mártebe alǵan, sebebi olar synaq ýchaskelerinde baǵalaý sharttarynan ótpegen.
Baza qazaqstandyq ázirlemelerge de erekshe nazar aýdarady: onda otandyq óndiristiń 37 tehnologııasy qamtylǵan. Olardyń qatarynda jańa energııa únemdeıtin qospalar, kóktaıǵaqqa qarsy materıaldar jáne jol negizin nyǵaıtatyn zamanaýı quramdar bar. Atalǵan tehnologııalar qysta joldardy kútip-ustaý jumystarynda qoldanylyp, qozǵalys qaýipsizdigin arttyrýǵa baǵyttalǵan.
Sondaı ázirlemelerdiń biri «Qazaqstandyq jol ǵylymı-zertteý ınstıtýty» (QazjolǴZI) mamandary daıypdap shyǵarǵan kóktaıǵaqqa qarsy reagentter. Bul materıaldar tuzsyz tehnologııa boıynsha ázirlengen jáne qorshaǵan ortaǵa qaýipsiz qoldanýǵa beıimdelgen. Mundaı sheshimder jol boıyndaǵy topyraqqa, sýǵa jáne ósimdikterge zııan keltirý qaýpin tómendetip, ınfraqurylym nysandary úshin qaýipsizdikti arttyrady.
Sarapshylardyń pikirinshe, Biryńǵaı bazanyń damýy jol salasy úshin ashyqtyqty qamtamasyz etedi jáne zerthanalyq ári joldaǵy synaqtardan ótken tehnologııalardy engizýge múmkindik beredi.
— Tsıfrlyq jikteý júıesi salany kezdeısoq nemese tekserilmegen ónimderden qorǵaıdy. Ol naqty obektilerde tıimdiligi dáleldengen materıaldardy tańdaýǵa múmkindik beredi. Bul joldardyń senimdiligin arttyryp, qurylys pen kútip-ustaýda jańa tásilderdi qoldanýǵa jaǵdaı jasaıdy», — dep habarlady «QazjolǴZI» ókilderi.
Tehnologııalar týraly barlyq aqparat, synaq nátıjeleri jáne olardy qoldaný jónindegi usynystar rcmbase.qazjolgzi.kz platformasynda qoljetimdi.
Eske sala keteıik, Qazaqstanda avtojoldardy salý jáne paıdalaný salasyndaǵy zańnamany jetildirý boıynsha júıeli jumys jalǵasatynyn jazǵanbyz. Budan bylaı qadaǵalaýshy mamandar jaýapkershilikke tartylatyn bolady.