Jol qurylysy, ótkizý beketteri: Bektenov jańa mınıstrge qandaı mindetter júktedi
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov Memleket basshysynyń tıisti Jarlyǵymen Premer-mınıstrdiń orynbasary — kólik mınıstri qyzmetine taǵaıyndalǵan Ásel Janasovany mınıstrlik ujymyna tanystyrdy.
Úkimettiń baspasóz qyzmeti habarlaǵandaı, jıynda Premer-mınıstr Nurlan Saýranbaevqa elimizdiń kólik salasyn damytýǵa qosqan úlesi úshin alǵysyn bildirdi.
Sondaı-aq Ásel Janasovanyń mol eńbek tájirıbesi atap ótildi. Ásel Janasova ár jyldary «Zerde» holdıngi jáne «Qazposhta» aktsıonerlik qoǵamyn basqarǵan. Sonymen qatar saýda jáne ıntegratsııa vıtse-mınıstri, Prezıdent keńesshisi, Prezıdent Ákimshiligi Basshysynyń orynbasary bolyp qyzmet atqarǵan.
Oljas Bektenov sala aldynda Memleket basshysy Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynda aıqyndalǵan aýqymdy mindetter turǵanyn atap ótti.
— Prezıdent kelesi jyldy aýqymdy qurylys jyly dep jarııalady. Bul kólik ınfraqurylymyn damytý salasyn da qamtıdy. Aldymyzda turǵan mindetter aıqyn. Elimizdiń geografııalyq ornalasýyn eskere otyryp, qolda bar áleýetti barynsha tıimdi paıdalanýymyz kerek. Keler jyly kólik salasynyń barlyq baǵyty boıynsha iri jobalardy iske qosý josparlanǵan. Sapaly ári ýaqtyly júzege asyrylýyn qamtamasyz etý qajet, — dep atap ótti Premer-mınıstr.
Kólik mınıstrliginiń negizgi basym baǵyttary qatarynda jergilikti jáne respýblıkalyq mańyzy bar avtomobıl joldary qurylysynyń joǵary sapasyn qamtamasyz etý, jol boıyndaǵy ınfraqurylymdy damytý, 2027 jyly avtomobıl ótkizý pýnktterin rekonstrýktsııalaýdy aıaqtaý, sondaı-aq Qazaqstannyń Eýrazııadaǵy negizgi kólik-logıstıkalyq hab retindegi pozıtsııasyn nyǵaıtý mindetteri aıqyndaldy.
Osyǵan deıin Memleket basshysynyń Jarlyǵymen Nurlan Saýranbaev Qazaqstan Respýblıkasynyń Kólik mınıstri laýazymynan bosatylyp, onyń ornyna Ásel Janasova taǵaıyndalǵanyn jazǵan edik.
