Jol qozǵalysy máselesinde barlyq taraptyń ózara jaýapkershiligi bolýǵa tıis - N. Nyǵmatýlın
ASTANA. 19 maýsym. QazAqparat - Májilistiń jalpy otyrysynda qaralyp jatqan «Jol qozǵalysy týraly» zań jobasyn talqylaý barysynda Palata Tóraǵasy Nurlan Nyǵmatýlın atalǵan qujattyń mańyzdylyǵy men sapasyna erekshe nazar aýdardy. Bul týraly Májilistiń baspasóz qyzmetinen habarlandy.
- Qazirgi ýaqytta elimizdegi áleýmettik-belsendi turǵynnyń árbir úshinshisi, osy zań jobasynda kórsetilgen qaǵıdalardyń oryndalýyna múddeli. Óıtkeni, bul jerde kólik júrgizý, jaıaý júrý, ózin-ózi ustaý mádenıeti tur. Sondyqtan, jol qozǵalysyna qatysy bar ár tarap ózara jaýapkershilikti sezinýge tıis, - dedi Nurlan Nyǵmatýlın.
Májilis Tóraǵasy Іshki ister organynda, sonyń ishinde, jol polıtsııasy júıesinde qyzmet etetin kadrlarǵa qatysty máseleni de nazardan tys qaldyrmady.
Spıkerdiń aıtýynsha, zań jobasyn ekinshi oqylymda, damyǵan elderdiń tájirıbesin ıgere otyryp taǵy da tolyqtyrý qajet jáne memlekettik emes qoǵamdyq uıym ókilderiniń qatysýymen jumys tobynda belsendi talqylaý kerek.
- Óıtkeni, bizdiń júrgizýshiler men jaıaý júrginshilerdiń arasyndaǵy qatynastyń negizgi erejelerin zań jobasyna qalaı engizetinimizge de kóp jaǵdaı baılanysty,-dep atap ótti Májilis Tóraǵasy.
Esterińizge sala keteıik, búgin Parlament Májilisiniń jalpy otyrysynda palata depýtattary «Jol júrisi týraly» zań jobasyn birinshi oqylymda maquldaǵan bolatyn.
