Jol qozǵalysy erejelerinen jol jáne kóshe boıyna kólik qoıýǵa shekteý joıyldy - QR ІІM
ASTANA. QazAqparat - Jol qozǵalysy erejelerinen eldi mekenderdegi jol jáne kóshe boıyna kólik qoıýǵa shekteý joıyldy. Bul týraly QazAqparat tilshisine QR ІІM Ákimshilik polıtsııa komıtetiniń baspasóz hatshysy Irına Lýkıanına aıtty.
«2015 jyldyń 1 qańtarynan bastap «Qazaqstanda kásipkerlik qyzmet úshin jaǵdaıdy jaqsartý jónindegi túbegeıli sharalar týraly QR keıbir zańnamalyq aktilerine ózgertýler men tolyqtyrýlar engizý týraly» Zańy kúshine endi. Osy Zań aıasynda «Jol qozǵalysy týraly» Zańǵa birqatar túzetýler engizilgen. Atap aıtar bolsaq, Zańnyń 54-babynyń 22 tarmaǵyndaǵy eldi mekenderdegi joldar men kóshe boılarynyń arnaıy belgilengen oryndarynan basqa jerine kólik qoıýǵa salynǵan tyıym alynyp tastaldy», - dedi I.Lýkıanına.
Aıta keteıik, buryn habarlanǵandaı, JQE-ge sáıkes bireýdiń avtokóligin júrgizýge senimhat alý jáne jańa kólikterge tehnıkalyq baqylaýdan ótý normalary joıyldy. Sonymen qatar, 2015 jyldyń 1 qańtarynan bastap Qazaqstanda kólik quralyn tirkeý týraly kýáliktiń jańa nusqasy beriledi.
