Jol-kólik oqıǵasyna úsh faktor áser etedi — ІІM ókili
ASTANA. KAZINFORM — Jol-kólik oqıǵalarynyń negizgi sebepteri men olardyń aldyn alý joldary týraly QR ІІM Ákimshilik polıtsııa komıtetiniń resmı ókili Aqtoty Boranova BIZDIÑ ORTA podkastynda aıtyp berdi.
Spıkerdiń sózinshe, kez kelgen jol-kólik oqıǵasynda bir tarapty ǵana kinálaý durys emes. Sebebi apattyń oryn alýyna birneshe faktor áser etedi.
— Jol-kólik oqıǵalaryna áser etetin úsh negizgi komponent bar. Olar — jol, avtokólik jáne júrgizýshi. Júrgizýshi jol qozǵalysy erejelerin saqtaýy kerek, kólik tehnıkalyq turǵydan jaramdy bolýy qajet. Al jol ınfraqurylymy júrgizýshiniń tarapynan jiberilgen qatelikti keshire alatyndaı bolý kerek, — dedi Aqtoty Boranova.
Onyń aıtýynsha, búginde jol ınfraqurylymyn jetildirý baǵytynda atqarylar jumys áli de bar.
— Qazirgi jaǵdaı tolyqtaı syn kóteredi deý qıyn. Degenmen bári nashar dep aıtýǵa bolmaıdy. Eger júrgizýshilerdiń qateligin belgili bir deńgeıde keshire alatyn qaýipsiz ınfraqurylym qalyptassa, jol-kólik oqıǵalarynyń saldary da jeńildeý bolar edi. Osy maqsatta zertteý jumystaryn júrgizip, olardyń nátıjeleri boıynsha jergilikti atqarýshy organdarǵa tıisti usynymdar beremiz, — dedi vedomstvo ókili.
Sonymen qatar ol «Jol júrisi týraly» zańnyń 17-babyna sáıkes árbir ákimdik óz aýmaǵyndaǵy jol qozǵalysy qaýipsizdigin qamtamasyz etýge jaýapty ekenin atap ótti.
Spıkerdiń aıtýynsha, júrgizilgen jumystardyń nátıjesinde keı jaǵdaıda zańnamaǵa ózgerister engizý nemese qoldanystaǵy qaǵıdalardy jańartý qajettiligi týyndaıdy.
— Іshki ister mınıstrligi Úkimet saǵattarynda, vedomstvoaralyq komıssııa otyrystarynda óz usynystaryn turaqty túrde kóterip keledi. Bul bastamalardyń barlyǵy jol qozǵalysy qaýipsizdigin arttyrýǵa jáne jol-kólik oqıǵalarynyń aldyn alýǵa baǵyttalǵan, — dep túıindedi Aqtoty Boranova.
Aıta keteıik, Abaı oblysynda jol qaýipsizdigin arttyratyn 13 lazerlik keshen ornatyldy.
Sonymen qatar SQO-da jol belgilerine qatysty 300-den astam kemshilik anyqtaldy.
