Jol-kólik oqıǵasynan kóbinese jolaýshylar men jaıaý júrginshiler japa shegedi - Prokýratýra

ASTANA. 1 tamyz. QazAqparat - Qazaqstanda aǵymdaǵy jyly jol-kólik oqıǵalar sany men odan japa shekkender qatary artyp otyr. Onyń ishinde mundaı oqıǵalardan júrgizýshilerge qaraǵanda kóbinese jolaýshylar men jaıaý júrginshiler japa shegýde. Bul týraly búgin baspasóz máslıhatynda Bas prokýratýranyń Quqyqtyq statıstıka jáne arnaıy esepke alý komıtetiniń ókili Rústem Ábdirahmanov málim etti.

Onyń aıtýynsha, jyl basynan beri jol-kólik oqıǵalar sany 49 paıyzǵa artyp, 10,5 myńǵa jetken. Al mundaı oqıǵalardan japa shekkender sany bir jarym esege artyp, 14,9 myń adamdy qurap otyr. «Jol-kólik oqıǵalarynan japa shekkenderdiń basym bóligi jolaýshylar - 41 % nemese 6 235 adamdy quraıdy, onyń ishinde ótken jeti aıda 537 adam qaıtys bolyp, 5 698 jaraqat aldy. Japa shekken jaıaý júrginshiler - 34 % nemese 5 069 adam (415 qaıtys bolyp, 4 654 jaraqattanǵan), júrgizýshiler - 23% nemese 3 406 adamdy (413 qaıtys bolsa, 2 993 jaraqattanǵan) qurap otyr», - deıdi R.Ábdirahmanov.