Jol-kólik oqıǵasyna kinálilerdiń jazadan jaltarýyna alyp keletin kóptegen olqylyqtar anyqtaldy - A. Daýylbaev

ASTANA. QazAqparat - Qate málimetter engizý saldarynan Jol qozǵalysy erejesin buzý faktileri hattamalarynyń kúshin joıý máseleleri oryn alyp otyr. Bul týraly búgin QR Bas prokýrory Ashat Daýylbaev málim etti.

«Sot tájirıbesin taldaý nátıjesinde jol-kólik oqıǵasyna kinálilerdiń jazadan jaltarýyna alyp keletin kóptegen olqylyqtar anyqtaldy. Buǵan yqpal etetin negizgi faktorlarǵa toqtalatyn bolsaq, polıtsııa qyzmetkerleri tarapynan keshiktirý saldarynan quqyq buzýshylyq merziminiń ótip ketýi, qaıtalap medıtsınalyq kýálandyrý júrgizý, qate málimetter engizý saldarynan hattamanyń kúshin joıý sekildi máseleler bar», - dedi ol Bas prokýratýranyń alqa májilisinde.

Onyń sózine qaraǵanda, osy tektes sebepterden tórt myńnan astam ákimshilik óndiris qysqartylǵan. Bunyń saldarynan alkogoldik mas kúıinde ustalǵan 600-den astam júrgizýshi tıisti jazadan qutylyp ketti.

Mundaı úrdis kinálilerdiń jasaǵan buzýshylyqtary úshin jazasyz qalý sezimin qalyptastyrýymen qaýipti bolyp otyrǵanyna toqtalǵan A. Daýylbaev, bul óz kezeginde quqyq buzýshylyqtyń qaıtalanýyna alyp keletinin atap ótti.