Jol-kólik oqıǵalary saldarynan Astanada 55 adam kóz jumǵan
ASTANA. 11 qarasha. QazAqparat - Sońǵy 10 aıda Astanada oryn alǵan jol-kólik oqıǵalary saldarynan 55 adam kóz jumdy. Bul týraly búgin ótken baspasóz máslıhatynda Ákimshilik polıtsııa basqarmasy basshysynyń orynbasary Baýyrjan Sholanov aıtty.
Onyń málimetinshe, osy aralyqta elorda joldarynda 500-den astam jol-kólik oqıǵalary tirkelgen. 590 adam túrli dene jaraqattaryn aldy. «Jol qozǵalysynyń kámelettik jasqa tolmaǵan qatysýshylary 124 jolkólik oqıǵasyna ushyrady. Ókinishke oraı, 4 bala kóz jumyp, 121-i jaraqattandy», - dep atap ótti B.Sholanov.
Sonymen qatar onyń aıtýynsha, aǵymdaǵy jyldyń 11 men 17 qarasha aralyǵynda Astana qalalyq ІІD-niń qyzmetkerleri múddeli memlekettik organdarmen, azamattyq qoǵam ınstıtýttarymen, buqaralyq aqparat quraldarymen birlese otyryp, «Jol qozǵalysy qaýipsizdigi aptalyǵy» keńaýqymdy aktsııasyn ótkizetin bolady.
Osyǵan oraı jol polıtsııasynyń jeke quramy kúsheıtilgen tártipte qyzmet atqardy.
Atalmysh aktsııa Búkilálemdik jol-kólik oqıǵasy qurbandaryn eske alý kúnine oraılastyrylady. Eske sala keteıik, BUU Bas assambleıasynyń Rezolıýtsııasyna sáıkes qarasha aıynyń úshinshi jeksenbisi Búkilálemdik jol-kólik oqıǵasy qurbandaryn eske alý kúni dep jarııalanǵan.
