Jol-kólik apatynan kóbinese balalar men jasóspirimder japa shegip jatyr

ASTANA. 1 tamyz. QazAqparat - Jyl basynan beri jol-kólik oqıǵasynan japa shekkenderdiń 54 paıyzyn balalar men jasóspirimder, al 46 paıyzyn eresekter men qarttar qurap otyr. Bul týraly búgin baspasóz máslıhatynda Bas prokýratýranyń Quqyqtyq statıstıka jáne arnaıy esepke alý komıtetiniń prokýrory Rústem Ábdirahmanov málim etti.

Prokýrordyń aıtýynsha, jol apattarynan elimizdiń Almaty, Ońtústik Qazaqstan, Jambyl oblystarynyń turǵyndary kóbirek japa shegýde. «Atap aıtar bolsaq, jyl basynan beri jol apatynan qaıtys bolǵandardyń basym bóligi Almaty oblysynda tirkelgen. Onda qaza bolǵandar sany 239 adamdy quraıdy. Sonymen qatar, Ońtústik Qazaqstan oblysynda jyl basynan beri - 215, Jambyl oblysynda - 138, Qaraǵandy oblysynda - 99, Shyǵys Qazaqstan oblysynda - 84, Aqmola oblysynda - 69 jáne Almaty qalasynda 62 adam qaıtys boldy. Jol-kólik oqıǵalaryn baǵalaý barysynda olardyń basym bóligi eldi-mekenderde oryn alatyny anyqtaldy», - deıdi prokýror. Onyń sózine qaraǵanda, jyl basynan beri eldi mekenderde jol kólik oqıǵasynyń 8 234 jaǵdaıy tirkelse, odan 541 adam qaza bolǵan. Al eldi mekenderden tysqary jerlerde oryn alǵan jol apattarynyń sany 2 208 bolsa, onda qaıtys bolǵandar 818 adamdy qurady.