Jol qaýipsizdigin kúsheıtý: Almatyda ýaqytsha polıtsııa beketteri jumys isteıdi
ALMATY. KAZINFORM – Almatyda jol qozǵalysy qaýipsizdigin baqylaýdyń jańa formaty – fıltratsııalyq beketter engizildi.
Qalalyq polıtsııa departamentiniń málimetinshe, túngi ýaqytta qalanyń negizgi kóshelerinde «bótelke moıny» tásilimen joldyń júrý bóligi ýaqytsha taryltylady. Bul tásil kólik aǵynyn baıaýlatyp, júrgizýshilerdi iriktep tekserýge, onyń ishinde mas kúıinde kólik basqarý derekterin anyqtaýǵa múmkindik beredi.
Osyndaı beketterdiń biri ótken demalys kúnderi Shyǵys aınalma avtomobıl jolynda jumys istedi. Qozǵalys qaýipsizdigin qamtamasyz etý maqsatynda ýaqytsha jol belgileri ornatyldy. Onyń ishinde jyldamdyqty 40-60 km/saǵ deıin shekteý, kedergini aınalyp ótý baǵytyn kórsetý jáne joldyń tarylýy týraly eskertý bar.
«Stop – buzýshylyqtar» jedel aldyn alý is-sharasy ótkizilgen 5 kún ishinde Almaty qalasynyń joldarynda 9 820 quqyqbuzýshylyqtyń joly kesilgen. Atap aıtqanda:
- 43 júrgizýshi mas kúıinde ustaldy;
- 78 júrgizýshiniń kólik basqarýǵa quqyǵy joq ekeni anyqtaldy;
- Buryn júrgizýshi kýáliginen aıyrylǵan 12 adam quryqtaldy;
- Jalǵan memlekettik nómirlik belgilerdi paıdalanýdyń 14 deregi áshkerelendi;
- Qarsy baǵytqa shyǵýdyń 36 faktisi tirkeldi.
Sonymen qatar 3 666 kólik quraly mamandandyrylǵan aıyppul turaqtaryna qoıylǵan.
– Fıltratsııalyq beketter – jol-kólik oqıǵalarynyń aldyn alýǵa baǵyttalǵan zamanaýı ári tıimdi ádisterdiń biri. Joldy jasandy túrde taryltý kólik aǵynynyń jyldamdyǵyn tómendetip, apattyq jaǵdaı týyndatpaı júrgizýshilerdi baqylaýǵa múmkindik beredi. Ásirese mas kúıinde kólik basqarý derekterin anyqtaýǵa basa nazar aýdarylady. Bul – aýyr jol-kólik oqıǵalarynyń negizgi sebepteriniń biri. Naqty nátıjeler bar: birneshe kúnniń ishinde ondaǵan mas júrgizýshi ustaldy. Bul baǵyttaǵy jumys jalǵasady, – dedi Almaty qalasy ákimshilik polıtsııa basqarmasynyń bastyǵy Ábdinur Tasybaev.
Eske salaıyq, Almaty joldaryna jasyryn patrýlder shyqty.
