Jol qaýipsizdigi strategııasy ázirlenip jatyr
ASTANA. KAZINFORM — Іshki ister organdary jańa salynǵan joldar paıdalanýǵa berilgenge deıin qozǵalys qaýipsizdigi talaptaryna sáıkestigin tekseredi. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
— 2024-2028 jyldarǵa arnalǵan qoǵamdyq qaýipsizdikti qamtamasyz etý tujyrymdamasy aıasynda jol qozǵalysy qaýipsizdigi deńgeıin arttyrý baǵytynda júıeli jumys júrgizilýde. Osy saladaǵy basqarýdy júıeleýge, memlekettik organdardyń qyzmetin úılestirýge jáne halyqaralyq jáne respýblıkalyq mańyzy bar avtomobıl joldarynda apattylyqty tómendetý sharalaryn iske asyrýǵa baǵyttalǵan Jol qaýipsizdigi strategııasy ázirlenip jatyr, — dedi Premer-mınıstr.
Onyń aıtýynsha, jańa joldar paıdalanýǵa berilgenge deıin ishki ister organdary tarapynan jol qozǵalysy qaýipsizdigi talaptaryna sáıkestigi týraly qorytyndy berilentin bolady. Mundaı mindetti normatıvtik ózgerister aldaǵy ýaqytta engiziledi.
— Barlyq jańa avtojol jobalaryndaǵy qaýipti ýchaskelerde jol qozǵalysy qaýipsizdigine ınspektsııa júrgiziledi. Jol-kólik oqıǵalarynyń sebepteri anyqtalyp, apattylyqty tómendetýge baǵyttalǵan tehnıkalyq sheshimder ázirlenedi, — dedi Oljas Bektenov.
Aıta keteıik, Májilis depýtaty Janarbek Áshimjan Premer-mınıstr Oljas Bektenovke saýal joldap, ótken jyly jol jamylǵysyn tıisti deńgeıde jóndep ustamaǵany úshin 7,4 myń laýazymdy jáne zańdy tulǵa jaýapkershilikke tartylǵanyna nazar aýdartqan edi.