Jol kartasy: Búginniń ózinde 113 myńnan astam adam jumysqa ornalasty
Eńbek jáne halyqty áleýmettik qorǵaý mınıstrliginen málim etkendeı, Jol kartasy sheńberinde jergilikti atqarýshy oryndar jalpy 6 506 jobany iske asyratyn bolady.
Infraqurylymdyq jobalardy iske asyrý 4 negizgi baǵyt boıynsha ótedi:
– áleýmettik-mádenı nysandardy kúrdeli jáne aǵymdaǵy jóndeý, rekonstrýktsııalaý jáne salý (2 703 joba);
– turǵyn úı-kommýnaldyq sharýashylyq nysandaryn kúrdeli, ortasha jáne aǵymdaǵy jóndeý, rekonstrýktsııalaý (1 039 joba);
– ınjenerlik-kólik ınfraqurylymyn kúrdeli, ortasha jáne aǵymdaǵy jóndeý, rekonstrýktsııalaý jáne salý (1 799 joba);
– eldi mekenderdi abattandyrý (965 joba).
Jumyspen qamtýdyń jol kartasy aıasyndaǵy ınfraqurylymdyq jobalardy iske asyrý kezinde otandyq óndirýshilerdiń keminde 90% taýarlary men qyzmetteri qoldanylatyn bolady. Sondaı-aq jumysshylardyń kem degende jartysy Halyqty jumyspen qamtý ortalyqtary arqyly qabyldanyp, basymdyq jumyssyz júrgen jastarǵa beriletidi. Merdigerler sanıtarlyq-epıdemıologııalyq sharalardy qoldana otyryp, qaýipsiz eńbek jaǵdaıyn qamtamasyz etýge tıis.
Mınıstrlikten málim etkendeı, 10 maýsymdaǵy jaǵdaı boıynsha óńirlerde 5 898 joba turǵysynda jumys bastalyp, 113,9 myń jumys orny quryldy. Munda 59,1 myńy Jumyspen qamtý ortalyqtary arqyly tartylǵan. Barlyǵy 255 myń jumys ornyn ashý josparlanýda. Bul rette Jol kartasy bolashaqta 100 myńnan astam turaqty jumys ornyn ashýǵa yqpal etedi.
Budan buryn habarlaǵandaı, Jumyspen qamtýdyń jol kartasyn júzege asyrýdyń aıtarlyqtaı oń áseri sezilmek.
Mysaly, 80 jańa bilim berý nysanynyń qurylysy apatty jáne úsh aýysymdy mektepterdiń máselelerin sheshýge, aýyldyq jerlerde bilim berý oryndaryna qoljetimdilikti arttyrýǵa, sondaı-aq 7 myńǵa jýyq muǵalimdi turaqty jumysqa ornalastyrýǵa múmkindik beredi. 24 densaýlyq saqtaý nysanynyń qurylysy alǵashqy medıtsınalyq-sanıtarlyq kómekke qoljetimdilikti arttyrady. Sondaı-aq shamamen 1 myń medıtsına qyzmetkerin jumysqa ornalastyrýǵa múmkindik beredi. 36 mádenıet jáne sport nysanynyń qurylysy buqaralyq sportty damytýǵa oń áser etip, jastar úshin bos ýaqyt máselesin sheshýge jáne 1,6 myń adamdy turaqty jumyspen qamtamasyz etýge múmkindik bolmaq.
Óz kezeginde, sý sharýashylyǵynyń 12 jańa nysanyn salý jáne qoldanystaǵylaryn jańǵyrtý halyq úshin aýyzsýdyń qoljetimdiligin arttyrady. Sýarmaly jerlerdiń kólemin keńeıtýge, paıdalanylmaıtyn jerlerdi aınalymǵa tartýǵa, aralas salalarda 77 myń adamdy jumyspen qamtýdy qamtamasyz etýge jaǵdaı jasalady. Turǵyn úı-kommýnaldyq sharýashylyǵynyń 247 jańa nysanyn salý jáne qoldanystaǵylaryn jańǵyrtý turǵyn úı qurylysy úshin oń yqpal etedi, aýyl turǵyndary úshin kommýnaldyq qyzmetterdiń qoljetimdiligin qamtamasyz etedi, kommýnaldyq jeliniń tozýyn tómendetedi. Eldi mekenderdi abattandyrý olardyń syrtqy kelbetin jaqsartyp qana qoımaı, azamattardyń qaýipsiz jáne jaıly demalysy úshin jaǵdaı jasaıdy.
