Jol kartasy boıynsha turǵyn úı - kommýnaldyq sharýashylyq salasynda bıyl 623 joba júzege asyrylady - Agenttiktiń jaýapty hatshysy
ALMATY. Naýryzdyń 2-si. QazAqparat /Erlik Erjanuly/ - Jol kartasy boıynsha turǵyn úı- kommýnaldyq sharýashylyq salasynda byltyr aýqymdy is- sharalar jasaldy.
Bul búgin Almatyda «Atakent» iskerlik yntymaqtastyq ortalyǵyndaǵy jańa kórme maýsymynyń ashylý rásimine arnalǵan baspasóz máslıhatynda aıtyldy, dep habarlaıdy QazAqparat.
«Jol kartasy boıynsha byltyr júzege asyrylǵan 875 jobanyń 862-si tolyq oryndalyp, 13-i bıyl jalǵastyrylady. 61,2 mıllıard teńge jumsalǵan bul baǵdarlama boıynsha úlken kólemde kóp jumystar tyndyryldy. 737 shaqyrym elektr jelisi, 2233 shaqyrym sý qubyry jáne 409 shaqyrym gazben qamtamasyz etý júıesi salynyp, 81 myń jumys orny ashyldy», deıdi QR Qurylys jáne turǵyn úı- kommýnaldyq sharýashylyq isteri agenttiginiń jaýapty hatshysy Salaýat Dembaı. Onyń aıtýynsha, 2014 jylǵa deıin jalǵasatyn bul baǵdarlama boıynsha bıyl 48 mıllıard teńge qarastyrylyp otyr. Onyń 30,5 mıllıardy respýblıkalyq, 17,5 mıllıardy jergilikti bıýdjetten bólinbek. Bul qarajatqa turǵyn úı- kommýnaldyq sharýashylyq salasyndaǵy nysandardy jóndeý jáne qaıta jańartýda 623 joba júzege asyrylyp, 43 myń jańa jumys oryn ashý josparlanyp otyr.
