«Jol kartasy» aıasynda turǵyn úı-kommýnaldyq sharýashylyǵyn damytýǵa 61,2 mlrd. teńge bólindi - S. Nokın
ASTANA. Qańtardyń 25-i. QazAqparat /Qanat Mámetqazyuly/ - 2009 jyly Úkimettiń «Jol kartasy» aıasynda elimizdiń turǵyn úı-kommýnaldyq sharýashylyǵyn damytýǵa 61,2 mlrd. teńge bólindi.
Búgin QR Parlamenti Májilisinde ótken Úkimet saǵatynda QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın osylaı málim etti, dep habarlaıdy QazAqparat.
«Memleket basshysynyń Joldaýyna sáıkes 2009 jyly «Turǵyn úı-kommýnaldyq sharýashylyqty damytý jáne jańǵyrtý» baǵyty boıynsha «Jol kartasy» iske asyryldy. Osy maqsatta 61,2 mlrd. teńge bólinip, onyń 60,7 mlrd. teńgesi nemese 99 paıyzy ıgerildi. Sonymen birge, atalǵan baǵyttaǵy mindetterdi iske asyrý barysynda 81 myń jumys orny ashyldy. Jalpy, ótken jyly turǵyn úı-kommýnaldyq sharýashylyq salasynda 284 shaqyrym jylý trassasy, 737 shaqyrym elektr jelileri, 284 shaqyrym gazben jabdyqtaý jelisi, 1 myń 29 shaqyrym sýmen jabdyqtaý jelisi jáne 172 shaqyrym sý burý jelisi salyndy jáne qaıta jóndeýden ótkizildi», dedi S. Nokın.
