«Jol kartasy» aıasynda aǵymdaǵy jyly 107 myń jumys orny quryldy
ASTANA. Maýsymnyń 14-i. QazAqparat /Ernur Aqanbaı / - Aǵymdaǵy jyly «Jol kartasy» boıynsha 128 myń jumys ornyn qurý josparlansa, qazirgi tańda is júzinde 107 myń jumys orny quryldy.
Bul jospardyń 83 paıyzyn quraıdy. Búgin Úkimet otyrysynda Eńbek jáne halyqty áleýmettik qorǵaý vıtse-mınıstri Birjan Nurymbetov osylaı málim etti.
Onyń sózine qaraǵanda, maýsymnyń 1-de qurylǵan jumys oryndaryna 65 myń adam eńbekke ornalastyryldy. Jumysqa ornalastyrylǵandardyń 62 paıyzdan astamy nemese 40,5 myń adam jumyspen qamtý organdary arqyly kelgender. Qurylǵan jumys oryndaryna óńirler boıynsha eńbekke ornalastyrý kórsetkishi Qyzylorda oblysyndaǵy 23 paıyzdan, Pavlodar oblysy, Almaty jáne Astana qalalaryndaǵy 100 paıyzǵa deıingi aralyqty qamtıdy. «Qazirgi ýaqytta únemdelgen qarjynyń esebinen qosymsha jobalar júzege asyryla bastady. Osyny eskersek, jumys oryndaryn qurý jáne eńbekke ornalastyrý jónindegi mindetti óńirler oryndaı alady dep senimmen aıtýǵa bolady», dedi vıtse-mınıstr.
Onyń aıtýynsha, «Jol kartasy» aıasyndaǵy júzege asyrylyp jatqan jobalardaǵy aılyq jalaqynyń ortasha mólsheri elimiz boıynsha 34 myń teńge deńgeıinde qalyptasyp otyr. Óńirler boıynsha aılyq jalaqynyń barynsha kóp mólsheri Almaty (48,3 myń teńge) jáne Astana (42,4 teńgeni) qalalarynda.
