Jol halyq úshin emes, jolshylar úshin jóndeletin sııaqty - Úkimet basshysy
«Tutynýshylar men halyq tarapynan joldarymyzdyń sapasyna qatysty kóp syn týyndap jatyr. Únemi jóndeýdi talap etedi. Únemi apat bolyp, adamdar mert bolady. Tipti, jóndelgen joldardyń ózderine keıistik bar. Jóndeý jumystary halyq, adamdar úshin emes, jolshylardyń ózderi úshin jasalatyn sııaqty seziledi. Bul máseleni erekshe baqylaýda ustaý qajet. Problemany tıimdi sheshýge múmkindik beretin keshendi is-sharalar kerek», - dedi Álıhan Smaıylov Indýstrııa jáne ınfraqurylymdyq damý mınıstrliginiń keńeıtilgen alqa otyrysynda.
Osy rette ol Memleket basshysy 2030 jylǵa deıin 8 myń shaqyrym respýblıkalyq jáne 14 myń shaqyrym jergilikti joldardy salý men jańǵyrtý tapsyrmasyn júktegendigin atap ótti.
«Bul – qomaqty kólem. Sondyqtan, barlyǵyn sapaly ári merziminde oryndaý úshin barlyq kúsh-jigerdi salý qajet. Mınıstrlikke «Jezqazǵan-Qaraǵandy», «Semeı-Óskemen», «Atyraý-Oral», «Aqtóbe-Ulǵaısyn» jobalaryn qarjylandyrý tetikterin aıqyndaý kerek. Sonymen qatar, osy jyldyń sońynda deıin «Qaraǵandy-Almaty», «Merke-Býrylbaıtal», «Aqtóbe-Atyraý-Astrahan», «Almaty-Óskemen», «Ónege-Beısen», «Jalpaqty-Kaztalovka», «Úsharal-Dostyq» nysandaryn salý jáne jańartý jobalarynda qozǵalys qamtamasyz etilýi tıis», - dedi Premer-Mınıstr.
