Jol erejesin jıi buzatyndarǵa aıyppul tóleýde 50% jeńildikti alyp tastaý kerek – senator
ASTANA. KAZINFORM – Aıyppul jol júrisi qaǵıdalarynyń jıi buzylmaýyna kepildik bere almaıdy. Senator Marat Qojaev óziniń depýtattyq saýalynda aıyppul arqyly erejeni qaıta buzýmen kúres múmkin emestigin aıta kelip, sońǵy kezde jol erejesin buzý derekteri kóbeıe túskenin atap ótti.

- Tehnıkalyq quraldar («Sergek» júıesi) Jol júrisi qaǵıdalaryn buzýdyń negizgi bóligin avtomatty túrde tirkeıdi. Erejeni júıeli túrde buzýdyń aldyn alýǵa qoldanystaǵy quqyq qoldaný tájirıbesi múmkindik bermeıdi. Óıtkeni tehnıkalyq quraldar arqyly avtomatty túrde tirkegen júrgizýshini erejeni qaıta buzǵany úshin jaýapqa tartý múmkin emes. Sebebi, kólik quralynyń ıesine ereje buzýdyń tarıhy eskerilmeı aıyppul jazylady. Sondaı-aq, jol qozǵalysy erejesin júıeli túrde elemeıtin, jol tártibin qasaqana buzýshylarǵa Jol júrisi qaǵıdalary boıynsha emtıhandy qaıta tapsyrýdy mindetteý múmkin emes. Sonymen qatar, tehnıkalyq quraldar erejeni buzý deregin ǵana tirkeıdi, biraq júrgizýshiniń daıyndyq deńgeıin jáne onyń jol erejesin óreskel buzý men qaýipti áreketke beıimdiligin baǵalaýǵa múmkindik bermeıdi, - dedi Marat Qojaev Úkimet basshysynyń atyna joldaǵan saýalynda.
Senator keıbir qaltaly júrgizýshiler aıyppuldy jaýapkershilikten qashýdyń tetigi retinde qaraıtynyn atap ótti. Máselen, Almatyda kólik quralynyń bir júrgizýshisi bir jylda 3 mln teńgeden astam somada aıyppul tólep, 143 ret ereje buzǵany anyqtalǵan.
Depýtat aldyn alý jumysyn kúsheıtý úshin mundaı júrgizýshilerdi synaqty qaıta tapsyrýǵa jiberýdi, sondaı-aq qajet bolǵan jaǵdaıda olardy júrgizýshi kýáliginen aıyrýdy usyndy.
- Ásirese, tehnıkalyq quraldar tirkegen ereje buzý deregi boıynsha júrgizýshilerdiń jaýapkershiligin kúsheıtý máselesin qaraýdy usynamyz. ÁQBtK-degi ózgeristerde tehnıkalyq quraldar tirkegen 10 jáne odan da kóp ereje buzý deregi bar júrgizýshilerdi Jol júrisi qaǵıdalary boıynsha teorııalyq emtıhandy qaıta tapsyrýǵa jiberýdi mindetti etý mańyzdy. Kameralar tirkegen jol qozǵalysy erejesin qaıtalap buzǵany úshin jaýapkershilikti kúsheıtý qajet, ıaǵnı júrgizýshi kýáliginen ýaqytsha aıyrýǵa deıin jazalanýy kerek. Zań talabyn buzatyndarǵa belgili bir kezeńdegi tártip buzý sanyn eskeretin saralanǵan jaza tetigin ázirleý jáne erejeni júıeli túrde buzatyndarǵa aıyppul tóleýde 50% jeńildikti alyp tastaý mańyzdy, - dedi depýtat.
Buǵan deıin Qaraǵandy oblysynda 65 jyl taksı qyzmetin kórsetip kelgen 83 jastaǵy qarııa birde bir ret jol erejesin buzbaǵanyn jazǵan edik.