Jol erejesin jıi buzatyndar aıyppuldy joǵary somada tóleýi kerek – senator

ASTANA. KAZINFORM — Senat depýtaty Marat Qojaev elimizde jol erejesin kún saıyn buzatyn júzdegen adam bar ekenin aıtty. 

— Júıeli túrde jol erejesin jıi buzatyndar úshin, ıaǵnı (bir jylda) qasaqana bir sanattaǵy erejeni 10 ret qatarynan buzsa, onda 11-shi ret qaıtalaǵan jaǵdaıda aıyppul boıynsha 50 paıyzdyq jeńildikti osy adamdarǵa qoldanbaý kerek. Bul usynys erejeni jıi buzbaıtyn adamdarǵa qatysty emes, olarǵa paıyzdyq jeńildik saqtalýy qajet, — dedi Marat Qojaev Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, jyl ishinde 195 myń júrgizýshi 10-nan 50-ge deıin jol qozǵalysy erejesin buzǵan. Al 50-den 100-ge deıin ereje buzǵan birneshe myń júrgizýshi bar. Sondaı-aq bir jylda 300 jáne odan da kóp jol qozǵalysy erejesin buzǵan júzdegen júrgizýshi anyqtalǵan.

— Kún saıyn ádeıi jol erejesin buzatyn osy júzdegen adam aıyppuldy tólep, ary qaraı júre beredi. Osy adamdar úshin 50 paıyzdyq jeńildikti alyp tastaýdy usynyp otyrmyn, — dedi senator.

Eske salsaq, bıyl aqpan aıynda senator Marat Qojaev jol erejesin jıi buzatyndarǵa aıyppul tóleýde 50% jeńildikti alyp tastaýdy usynǵan edi.

Depýtat aldyn alý jumysyn kúsheıtý úshin mundaı júrgizýshilerdi synaqty qaıta tapsyrýǵa jiberýdi, sondaı-aq qajet bolǵan jaǵdaıda olardy júrgizýshi kýáliginen aıyrý kerek ekenin aıtty.

Atap aıtqanda, elimizde jol erejesin buzǵandar aıyppul salynǵan kúnnen bastap bir aptanyń ishinde tólese, onda osy aıyppuldyń jartysyn ǵana óteý múmkindigi jasalǵan.