Jol erejesin jıi buzatyn qaltaly jastarǵa shara qoldaný kerek - senator

ASTANA. KAZINFORM – Senator Marat Qojaev óziniń depýtattyq saýalynda nelikten jol erejesin jıi buzatyndarǵa aıyppul kólemin arttyrý usynysyn aıtqanyn túsindirdi.

- Qańtar aıynda óńirlerdi aralap keldik. Sol kezde jol erejesin óreskel buzatyndardyń derekterimen tanystyq. Máselen, Almatyda ondaǵan jas jigit qymbat kólikterdi tizgindep, aıyppul tóleýdi sonshalyqty aýyrtpalyq sanamaı júrgenin bildik. Olar kún saıyn jol erejesin buzady, qatty jyldamdyqpen júredi. Bul derekterdi kameralar anyqtap jatyr, biraq olarǵa aıyppuldan basqa jaza qoldanylmaıdy. Al aıyppuldy bir aptanyń ishinde ótese, ony jeńildikpen tek 50 paıyz ǵana tóleıdi. Atap aıtqanda, qarapaıym halyqqa 14 myń teńge aıyppul kádimgideı aýyrpalyq túsirse, al jańaǵy qaltaly jastar ony kúndelikti shamaly shyǵyny dep kóredi, - dedi M. Qojaev Senattyń jalpy otyrysynan keıin tilshiler suraǵyna jaýap bere otyryp.

Osy oraıda ol jol erejesin jıi buzatyndarǵa basqa da jazalaý sharalaryn qoldaný kerek ekenin aıtty.

- Bul adamdardy tártipke tartý kerek qoı?! Kólik quralynyń bir júrgizýshisi bir jylda 143 ret ereje buzǵan (Almatyda) jáne aıyppuldy 50 paıyz jeńildikpen ótegen. Bul adamdarǵa aıyppul tóleý sonshalyqty shyǵyn emes. Sol sebepti tıisti usynysty jarııaladym, - dedi depýtat.

Eske salsaq, jaqynda senator Marat Qojaev óziniń depýtattyq saýalynda aıyppul arqyly erejeni qaıta buzýmen kúres múmkin emestigin aıta kelip, sońǵy kezde jol erejesin buzý derekteri kóbeıe túskenin atap ótti.

Osy oraıda ol Úkimet basshysynyń atyna saýal joldap, óziniń usynystaryn aıtty.

Depýtattyń paıymynsha, jol erejesin jıi buzatyndarǵa aıyppul tóleýde 50% jeńildikti alyp tastaý kerek.