Jol erejesin óreskel buzǵandarǵa qatań shara: ákimshilik qamaq qoldanylady
ASTANA. KAZINFORM — Astanada jol qozǵalysy erejelerin óreskel ári qasaqana buzatyn júrgizýshilerge qatysty jaýapkershilik kúsheıtildi. Endi agressıvti júrgizý, qaýipti manevr jasaý jáne qoǵamǵa qaýip tóndiretin áreketter úshin tek aıyppul ǵana emes, 15 táýlikke deıin ákimshilik qamaq ta qoldanylýy múmkin. Prokýratýra bul sharalar jol qaýipsizdigin arttyrýǵa jáne quqyq buzýshylyqtyń aldyn alýǵa baǵyttalǵanyn atap ótti.
Prokýratýranyń málimetinshe, agressıvti júrgizý, jyldamdyqty arttyrý jáne qaýipti manevr jasaý azamattardyń ómiri men densaýlyǵyna naqty qaýip tóndiredi jáne túbegeıli quqyqtyq baǵalaýdy qajet etedi. Keıbir jaǵdaılarda mundaı quqyq buzýshylyqtardyń aldyn alý úshin tek aıyppul salý jetkiliksiz.
— Júıeli túrde, qasaqana jáne óreskel buzýshylyqtarǵa jol beretin júrgizýshilerge qatysty neǵurlym qatań tásil qoldanylady: olardyń áreketteri 15 táýlikke deıin ákimshilik qamaqqa alýdy kózdeıtin Qazaqstan Respýblıkasy ÁQBtK-niń 434-baby boıynsha (usaq buzaqylyq) qosymsha saralanady, — delingen vedomstvonyń habarlamasynda.
tipti atalǵan bap boıynsha birneshe adam jaýapqa tartylǵan. Bul rette olardyń barlyǵy buryn aıyppul túrinde birneshe ret ákimshilik jaýaptylyqqa tartylǵan, alaıda bul tıisti profılaktıkalyq áser etpegenin atap ótken jón.
Bul jyldamdyqty az mólsherde bir rettik asyrý týraly emes. Qabyldanyp otyrǵan sharalar zań talaptaryn sanaly túrde elemeıtin, aınalasyndaǵylarǵa aıqyn mensinbeýshilik tanytatyn, erejelerdi ádeıi ári kórsetip buzatyn, keıde muny áleýmettik jelilerde jarııalap, maqtan etetin júrgizýshilerge qatysty qoldanylady.
Mundaı áreketter qoǵamdyq oryndarda jasalyp, jol qozǵalysynyń basqa qatysýshylaryna naqty qaýip tóndiredi, qoǵamdyq tártip pen azamattardyń tynyshtyǵyn buzady jáne óziniń sıpaty boıynsha ádettegi ákimshilik quqyq buzýshylyq sheńberinen shyǵyp, usaq buzaqylyq belgilerine ıe bolady.
Bul tájirıbe prokýratýra men polıtsııa organdarynyń úılestirilgen jumysy aıasynda sot tártibimen júzege asyrylyp, jaýaptylyqtyń bultartpastyq qaǵıdatyn qamtamasyz etýge jáne joldardaǵy asa qaýipti qaýipti minez-qulyq túrleriniń jolyn kesýge múmkindik beredi.
Astana qalasynyń prokýrory Ǵabıt Muqanov atap ótkendeı, qasaqana quqyq buzýshylardy oqshaýlaýǵa baılanysty sharalardy qoldaný agressıvti júrgizýge tózbeýshilikti qalyptastyrýǵa jáne jol-kólik oqıǵalarynyń sanyn azaıtýǵa baǵyttalǵan.
Elorda prokýratýrasy júrgizýshilerdi jol qozǵalysy qaǵıdalaryn qatań saqtaýǵa, aınalasyndaǵylarǵa qurmetpen qaraýǵa jáne joldaǵy qaýipsizdik — ortaq jaýaptylyq ekenin este saqtaýǵa shaqyrady.
Buǵan deıin Astanada jyl basynan beri jol erejesin 61 ret buzǵan júrgizýshi ustalǵanyn jazdyq.
