Jol erejesin óreskel buzatyndar júrgizýshi kýáliginen 1 jylǵa aıyrylýy múmkin
ASTANA. KAZINFORM — 70 myń oń rýldi kólik taksı retinde tirkele almaıdy. Bul týraly búgin Úkimet otyrysynda Іshki ister mınıstri Erjan Sádenov aıtty.
— Avtotasymal salasy erekshe baqylaýda tur. 2025 jyldan bastap taksı agregatorlaryna baqylaý kúsheıtildi. Olarmen tsıfrlyq aqparat almasýdy jolǵa qoıdyq. Mysaly, olarǵa 70 myń oń rýldi kólik tizimi jiberildi. Olar endi taksı retinde tirkele almaıdy. Sondaı-aq, júrgizýshi kýálikterin avtomatty túrde tekserý engizilip jatyr, ıaǵnı, kýáligi joq adamdar jumys isteı almaıdy. Oǵan qosa, Kólik mınıstrligi men taksı agregatorlaryna júrgizýshilerdiń reıs aldynda medıtsınalyq tekserýden ótýin, kólikterdiń tehnıkalyq tekserýi bolýyn baqylaýdyń naqty tetigin ázirleý qajet, — dedi mınıstr.
Onyń aıtýynsha, Іshki ister mınıstrligi jol qaýipsizdigi deńgeıin arttyrý baǵytynda qajetti sharalardy qabyldap jatyr.
— Qazirgi ýaqytta aıyppuldy elemeıtin «óreskel» quqyq buzýshylar bar. Olarmen kúresý maqsatynda «balldyq» júıeni engizýdi pysyqtaýdamyz. Ol árbir zańbuzýshylyqty jáne onyń aýyrlyǵyn eskeredi. Aıyppulmen qatar, birneshe márte jáne aýyr buzýshylyqtar úshin júrgizýshi kýáligin 1 jylǵa toqtatý kózdeledi. Tıisti túzetýlerdi Quryltaıdyń qaraýyna engizemiz, — dedi ol.
Sonymen qatar ol jol qaýipsizdigine qatysty keıbir sheshimder ókiletti organdar men ákimdikter tarapynan tolyǵymen oryndalmaı jatqanyna shaǵymdandy.
— Osyǵan baılanysty sizdiń atyńyzǵa kináli tulǵalardyń jaýapkershiligi boıynsha tıisti usynys pen aqparatty bólek engizýine ruqsat etińiz, — dedi Erjan Sádenov Premer-mınıstr Oljas Bektenovke.
Aıta keteıik, otyrysta jol qozǵalysy qaýipsizdigin qamtamasyz etý máselesi qaralyp, jylý berý maýsymyna daıyndyq barysy pysyqtalyp jatyr.
