Jol erejesin buzǵandarǵa saqtandyrý aqysy artady, uqypty júrgizýshilerge jeńildik jasalady
ASTANA. KAZINFORM – Qazaqstanda jol júrý erejesin buzǵandardyń saqtandyrý polısi ulǵaıady, al uqypty júrgizgenderge qosymsha jeńildikter berilmek. QR Qarjy naryǵyn retteý jáne damytý agenttigi «Qazaqstan Respýblıkasynyń keıbir normatıvtik quqyqtyq aktilerine saqtandyrý qyzmetin jetildirý máseleleri boıynsha ózgerister men tolyqtyrýlar engizý týraly» agenttik basqarmasynyń qaýly jobasyn ázirledi.
Qujatta usynylǵan basty ózgerister mindetti avtokólik saqtandyrýy boıynsha «bonýs-malýs» júıesin jetildirýge qatysty bolmaq. Bul júıe klıenttiń saqtandyrý jaǵdaılaryna qaraı tólem qunyn esepteýde qoldanylady. Esh apatsyz júrý kezinde «bonýs-malýs» klassy artady jáne klıent kinásinen apat bolǵan jaǵdaıda tómendeıdi. Tıisinshe, «bonýs-malýs» klassy neǵurlym joǵary bolsa, saqtandyrý quny soǵurlym arzan bolady.
Qazirgi «bonýs-malýs» júıesi Qazaqstanda 2007 jyldan beri qoldanysta jáne 15 klasstan (13 negizgi jáne «0» men «M» klasstary) turady.
«Agenttik «bonýs-malýs» júıesin 15-ten 18 synypqa deıin keńeıtýdi usynady jáne jańa «M1» jáne «M2» klasstary qosylady, olar jol-kólik oqıǵalaryna jıi tap bolatyn júrgizýshilerge qoldanylady. Bul synyptar bir jylda 3 jáne odan da kóp jol-kólik oqıǵasyn jasaǵan jaǵdaıda qoldanylady. Eń joǵary «13» synypta kóterilgen, bes jyldan astam ýaqyt boıy jol apatyna ushyramaǵan uqypty júrgizýshiler úshin saqtandyrý quny tómendetiledi», - dep túsindirdi agenttikten.
«Bonýs-malýs» júıesinde saqtandyrý jaǵdaılarynyń sanyn ǵana emes, keltirilgen zalaldyń aýyrlyǵyn da eskerý mańyzdy jańalyq bolyp otyr.
«Bul burynnan bar júıe, tek jol-kólik oqıǵasynyń aýqymyna nazar aýdarý kerek. Eger saqtandyrý kompanııasy óteıtin shyǵyn mólsheri 200 AEK-ten (2024 jyly 738 400 teńge) az bolsa, bul «bonýs-malýs» júıesine kóp áser etpeıdi. Al eger shyǵyn kólemi shektik somaǵa jetse, onda kelesi joly polıs rásimdeıtin somasy eki esege ósedi. Júrgizýshi uzaq jyldar boıy zań buzbasa, onda oǵan taǵy qosymsha jeńildik beriledi», - dep túsindirdi Qazaqstan saqtandyrýshylar qaýymdastyǵynyń tóraǵasy Vıtalıı Verevkın.
Jańa júıe kólik júrgizý kezinde jol qozǵalysy erejelerin saqtaýdy da eskeredi. JKO jasaǵan júrgizýshide mysaly, jyldamdyqty 40 km/saǵattan asyrǵany, qozǵalystyń qarsy baǵytyna shyǵyp ketkeni nemese avarııalyq jaǵdaı týǵyzǵany úshin aıyppuldary bolsa, onda kelesi saqtandyrý kelisim-shartyn jasaǵanda onyń «bonýs-malýs» klassy avtomatty túrde tómendeıdi. Sonymen qatar, ákimshilik jáne qylmystyq quqyqbuzýshylyqtar tek saqtandyrý kezeńinde, ıaǵnı jyl ishinde úsh jáne odan da kóp jol qozǵalysy erejelerin buzǵanda ǵana eskeriledi.
Mundaı tájirıbe álemniń kóptegen elderinde júrgizýshilerdi uqypty júrgizýge jáne kólik júrgizý erejeleri men mádenıetin saqtaýǵa yntalandyrý úshin qoldanylady. Sondaı-aq, «bonýs-malýs» júıesin saqtanýshynyń nemese saqtandyrylǵan adamnyń qatysýymen kólik júrgizetin júrgizýshilerge, sonyń ishinde karsherıngke taratý usynylǵan.
Jobanyń tolyq mátinimen ashyq normatıvtik quqyqtyq aktilerdiń «Ashyq NQA» ınternet-portalynan jáne Agenttiktiń resmı ınternet-resýrsynan «Normatıvtik quqyqtyq baza» bóliminde tanysýǵa bolady.
