Jol erejesin buzǵan Pavlodar turǵyndary 1,5 mlrd teńge aıypul tólegen

PAVLODAR. KAZINFORM - Polıtseıler byltyr jol qozǵalysyna qatysty 132 myńnan astam faktini tirkegen. Myńnan astam júrgizýshi kýáliginen aıryldy.

Oblysta patrýldik avtokólikterge ornatylǵan 48 avtomatty jol júrý erejesin tirkeý júıesi, 6 «kıber-sherıf» apparattyq-baǵdarlamalyq kesheni jumys isteıdi.

Olardyń kómegimen 29 myń zańbuzýshylyq anyqtalyp, jalpy somasy 402 mln teńgeden astam aıyppul salyndy.

Polıtseıler bıyl taǵy 4 keshen satyp alý josparlanyp otyrǵanyn atap ótti.

Ótken jyly Pavlodar-Qyzylorda respýblıkalyq tas jolynda 12 kameraǵa 3 «Zerek» júıesi ornatyldy.

- Ertis-Baıan óńirinde jol qozǵalysy qaýipsizdigine baǵyttalǵan profılaktıkalyq is-sharalar turaqty túrde júrgiziledi. Byltyr bizdiń qyzmetkerler 132 myńnan astam faktini tirkep, jalpy somasy 1,5 mlrd teńgege aıyppul saldy. Qabyldanyp jatqan sharalardyń arqasynda óńirdegi jol – kólik oqıǵalarynyń sany 3%-ǵa nemese 20 faktige tómendedi - dep habarlady Pavlodar oblysy polıtsııa departamenti bastyǵynyń birinshi orynbasary Jasqaırat Qaıyrov.

Atap óterligi, jol qozǵalysyn qadaǵalaýdyń tıimdiligin arttyrý maqsatynda polıtseılerdiń planshetterinde «Qorǵaý» mobıldi qosymshasy ornatylǵan.

Onyń kómegimen 118 avtokólik aıyp turaǵyna qoıylyp, kólik ıeleri 8 mln teńgeden astam soma aıyppulǵa kesildi.