Jol erejesin buzatyndardyń 10%-y óreskel quqyqbuzýshylyqqa jol beredi — ІІM
ASTANA. KAZINFORM — Jol qaýipsizdigin qamtamasyz etý maqsatynda elimizde tsıfrlyq sheshimder men jasandy ıntellekt tehnologııalary keńinen qoldanylyp keledi. Bul týraly QR ІІM Ákimshilik polıtsııa komıtetiniń resmı ókili Aqtoty Boranova BIZDIÑ ORTA podkastynda aıtty.
Aqtoty Boranova suhbat barysynda Іshki ister mınıstrligi jol qozǵalysy salasyna tsıfrlyq tehnologııalardy 2006 jyldan bastap engizip keletinin alǵa tartty. Onyń sózinshe, zaman talabyna sáıkes jol qaýipsizdigin qamtamasyz etý úshin túrli tsıfrlyq sheshimder engizilip jatyr. Qazirgi tańda jasandy ıntellekt múmkindikteri de qoldanylyp jatyr.
— Máselen, Astananyń ózinde táýligine shamamen 500 myń kólik qozǵalady. Sonyń ishinde júrgizýshilerdiń 30 paıyzy jol qozǵalysy erejelerin buzady. Al olardyń 10 paıyzy óreskel zańbuzýshylyqtarǵa jol beredi, — dedi Aqtoty Boranova.
Spıkerdiń aıtýynsha, jol qozǵalysy salasyndaǵy barlyq ózgeris pen baqylaý tetikteri eń aldymen jol qozǵalysyna qatysýshylardyń qaýipsizdigin qamtamasyz etýge baǵyttalǵan.
— Zańnamadaǵy qatańdatý sharalary, aıyppul mólsheriniń ósýi nemese ortasha jyldamdyqty baqylaý júıesiniń engizilýi — bári de jol erejesin óreskel buzatyn júrgizýshilerge qatysty qabyldanǵan sheshimder. Bul sharalar jol qozǵalysynyń qalǵan qatysýshylarynyń qaýipsizdigin qorǵaýǵa baǵyttalǵan, — dedi vedomstvo ókili.
Sonymen qatar ol jol qozǵalysy erejelerin saqtaǵan azamattarǵa eshqandaı aıyppul salynbaıtynyn atap ótti.
— Eger júrgizýshi jol qozǵalysy erejelerin buzbasa, oǵan aıyppul da kelmeıdi. Sondyqtan barlyq júrgizýshini quqyqbuzýshy dep qarastyrýǵa bolmaıdy. Degenmen jol erejesin buzatyn azamattardyń úlesi áli de joǵary, — dep túıindedi Aqtoty Boranova.
Buǵan deıin Abaı oblysynda bir táýlikte 91 buzýshylyq anyqtalǵanyn jazǵanbyz.
Sonymen qatar Almatyda bir táýlikte 2 myńnan astam zańbuzýshylyq toqtatyldy.
