Jol erejesin buzýdyń 50%-in kameralar anyqtaıdy

ASTANA. QazAqparat – Qazaqstanda jol erejesin buzý faktilerin tirkeıtin kameralar áli de jetispeıdi. Bul týraly QR Іshki ister mınıstri Marat Ahmetjanov aıtty, dep habarlaıdy QazAqparat tilshisi.

«Búgingi tańda jol erejesin buzý faktilerin tirkeıtin 17 myńnan astam avtomatty kamera jumys isteıdi. Olar óz tıimdiligin kórsetip jatyr. Jol erejesin buzýdyń 50% osy kameralar anyqtap jatyr. Al Astana men Shymkentte bul kórsetkish 70% deıin jetedi», - dedi Marat Ahmetjanov Úkimettiń búgingi otyrysynda.

Degenmen, Іshki ister mınıstri el kóleminde kameralar sany áli de jetispeıtinin aıtty.

«Mysaly Soltústik Qazaqstanda bar-joǵy 43 kamera ǵana bar. Pavlodar (58), Qyzylorda (65), Mańǵystaý (70), Aqmola (82), Batys Qazaqstan (94) jáne Túrkistan (100) oblystarynda kameralar sany 100-den aspaıdy», - dedi M. Ahmetjanov.

Sonymen birge, jalpy el boıynsha qıylystarda 1 200 baǵdarsham, 1 600 «keri sanaq» tablosy, 25 myń jol belgisi jáne 1 mln shaqyrymnan astam jol tańbasyn ornatý qajet.

«Jol qorshaýlary boıynsha da jaǵdaı máz emes. Jalpy respýblıka boıynsha 2 mln pagondyq metr qajettilik bar. Olardy ornatý jumystary Almaty, Jetisý oblystarynda jáne Shymkent qalasynda nashar júrip jatyr», - dedi M. Ahmetjanov.

Buǵan deıin spıker jyl saıyn elimizde 13 myń jol-kólik oqıǵasy bolatynyn, 2 myńnan astam adam qaza taýyp, 18 myń adam jaraqat alatynyn aıtqan edi.

Marat Ahmetjanov avtomektepterdiń oqytý sapasyn synǵa aldy.

Sondaı-aq mınıstr kólikti tehnıkalyq baıqaý operatorlarynyń jaýapkershiligin kúsheıtýdi usyndy.