Jol erejesin buzý faktileriniń 44 paıyzyn beınebaqylaý kamerasy anyqtaǵan

NUR-SULTAN. QazAqparat – Elimizde jol qozǵalysy erejesin buzýdyń 44 paıyzy beınebaqylaý kamerasynyń kómegimen anyqtalyp jatyr. Bul týraly QR Іshki ister mınıstriniń orynbasary Sáken Sársenov málim etti, dep habarlaıdy QazAqparat tilshisi.

«Jol qozǵalysy erejesiniń saqtalýyn qadaǵalaý salasyna da tsıfrlandyrý engizilip jatyr. Mysaly, el boıynsha joldarda 13 myńnan astam beınebaqylaý kamerasy ornatylǵan. Olar jol erejesiniń buzylýyn avtomatty túrde anyqtaıdy. Búginde ereje buzý faktileriniń 44 paıyzy beınebaqylaý kamerasynyń kómegimen anyqtalyp otyr. Jol boıyna beınebaqylaý ornatý jol qozǵalysy tártibin rettep qana qoımaı, jol-kólik apatynyń aldyn alýǵa septigin tıgizedi. Sonymen qatar polıtsııa qyzmetkerimen tikeleı baılanysýdyń qajeti joq», - dedi Sáken Sársenov OKQ-de ótken baspasóz máslıhatynda.

Onyń aıtýynsha, beınebaqylaý kameralary jol boıynda bolýy múmkin basqa da zańbuzýshylyqtardy anyqtaýǵa múmkindik beredi.

«Mysaly, jol boıynda beınebaqylaý kameralaryn ornatýdyń nátıjesinde 2019-2020 jyldary Túrkistan oblysynda jol-kólik oqıǵasy sanyn 21,6%-ǵa azaıtýǵa múmkindik berdi (579-dan 454-ke deıin azaıdy). Qazirgi ýaqytta óńirlik Polıtsııa departamentteri jol-kólik oqıǵalaryna taldaý jasap, kólik apaty jıi bolatyn ıaǵnı qaýipti aımaqtardy anyqtap jatyr. Anyqtalǵan soń ol jerlerge jergilikti atqarýshy organdarmen birlesip beınebaqylaý kamerasyn ornatý máselesi sheshiledi», - deıdi ol.