Jol erejesin buzǵan azamattar aıyppuly bar ekendigin bankterden de bile alady
ASTANA. QazAqparat - Jol qozǵalysy erejesin buzǵany úshin aıyppuly bar ekendigin azamattar endigi ýaqytta ekinshi deńgeıli bank bólimsheleriniń esep aıyrysý kassalalarynan bile alady. Bul týraly QR Іshki ister mınıstrliginiń baspasóz qyzmetinen habarlady.
Vedomstvonyń habarlaýynsha, 20 qazan kúni «Jol qozǵalysy týraly» Zań kúshine engen. Atalǵan zańnyń normalarynyń birinde jol qozǵalysy qaýipsizdigin qamtamasyz etý salasynda aıyppul túrinde ákimshilik jaza taǵaıyndaý týraly qaýlyny der ýaqytynda oryndamaǵan kólik quralyn memlekettik tirkeýge nemese kólik quralynyń tirkeý málimetterin ózgertýge shekteý qoıylǵan.
Osy rette aıyppul tóleý protsedýrasyn jeńildetý maqsatynda QR ІІM Ákimshilik polıtsııa komıteti «Ulttyq aqparattyq tehnologııalar» AQ-y, QR Ulttyq banki «Qazaqstandyq bankaralyq esep aıyrysý ortalyǵy» RMK jáne ekinshi deńgeıli banktermen birlesip, 2014 jyldyń qazanynan Jol qozǵalysy erejesin buzǵany úshin aıyppuldardy ekinshi deńgeıli bank bólimsheleriniń esep aıyrysý kassalarynda on-laın rejiminde júzege asyrý múmkindigin iske qosty
Endigi ýaqytta azamattar ekinshi deńgeıli bank bólimsheleriniń esep aıyrysý kassalarynda Jol qozǵalysy erejesin buzǵany úshin aıyppulynyń baryn bile alady jáne on-laın tólem júzesin paıdalanyp, ony óteı alady. Buǵan qosa, aıyppuldyń ótelgendigi jaıynda aqparat ishki ister organdarynyń ákimshilik quqyq buzýshylyqtardy esepke alý aqparattyq júıesine birden jetkiziledi.
Búgingi tańda atalǵan júıege «Tsentrkredıtbanki» AQ, «Qazaq banki» AQ, «Qazaqstandaǵy Pákistannyń Ulttyq banki» AQ, «Reseı jınaq banki»AQ, «Eksım bank» AQ, «Bank Kassa Nova» AQ, PNB Kazakhstan AQ, Delta Bank AQ, Asia Credit Bank AQ, Forte Bank AQ qosylǵan.
Aldaǵy ýaqytta bul júıege elimizdegi basqa da ekinshi deńgeıli bankter qosylatyn bolady.
