Jol erejesin buzǵan áıel júrgizýshi eki jylǵa bas bostandyǵynan aıyryldy

Pavlodar oblysynyń Ertis aýdandyq soty sońy adam ólimine alyp kelgen jolda júrý erejesin buzý faktisi boıynsha isti qarady, dep habarlaıdy baspasóz qyzmeti.

Qylmystyq is materıaldaryndaǵy málimetter boıynsha, isti bolǵan azamat «Volkswagen Passat» markili kóligimen «Lenınskıı»-«Rýskaıa Polıana» avtojolynyń boıynda kele jatyp, jolda júrý erejesin buzyp, kólikti basqara almaı joldan shyǵyp ketedi. Osy oqıǵanyń saldarynan onyń 1998 jyly týǵan balasy aýyr dene jaraqattaryn alyp, aýrýhanaǵa jetpesten kóz jumady.

Qylmystyq is Ertis aýdandyq prokýrory men zań buzǵan azamat arasynda kelisim óndirisi boıynsha sondaı-aq advokattyń qatysýymen qozǵaldy. Zań buzýshy kinásin moıyndady.

Sot úkimimen kólik júrgizgen áıel QK 345 babynyń 3-shi tarmaǵy boıynsha kináli dep tanylyp, oǵan 3 jyl kólik basqarýǵa tyıym salynyp, eki jylǵa bas bostandyǵynan aıyrý jazasy berildi.

Sot úkimi ázirge kúshine engen joq.